গুৱাহাটী, 26 ছেপ্তেম্বৰ : বজাৰ কৰিবলৈ আহিল দুগৰাকী যুৱতী । বজাৰ কৰি থকাৰ মাজতেই পথত ঢলি পৰিল এগৰাকী যুৱতী । ইয়াৰ পাচতেই পথত হুৱা-দুৱা লগাত ওচৰতে থকা কেইবাজনো লোক আহি তুলি ধৰে যুৱতীগৰাকীক । কোনোৱে আনে পানীৰ বটল, আকৌ আন কোনোৱে আনে ORS ৷
আন একাংশ লোকে যুৱতীগৰাকীক ওচৰতে থকা ফাৰ্মাচীত নিয়াৰ বাবে পৰামৰ্শ দিয়ে । কিন্তু এজন যুৱকে অসুস্থ যুৱতীগৰাকীক ফাৰ্মাচীত নিয়াৰ পৰিবৰ্তে ওচৰতে থকা এজন বাবাৰ ওচৰত নিয়াৰ পৰামৰ্শ দিয়ে । ইয়াৰ পাচতেই যুৱতীগৰাকীক বাবাজনে জৰা-ফুকা কৰি যুৱতীগৰাকীৰ অপদৃষ্টি লগা বুলি উল্লেখ কৰে ৷
বাবাজনে যুৱতীগৰাকীক সুস্থ হোৱা বুলি কৈ যাবলৈ অনুমতি প্ৰদান কৰে । কিন্তু কিছুদূৰ যোৱাৰ পাচতে পুনৰ অসুস্থ হৈ পৰে যুৱতীগৰাকী ৷ অৱশেষত চিকিৎসাৰ বাবে ফাৰ্মাচীলৈ লৈ নিয়া হয় যুৱতীগৰাকীক ৷
প্ৰকৃততে এয়া আছিল এক নাট্যৰূপহে । বিশ্ব ফাৰ্মাচিষ্ট দিৱস(World Pharmacist Day) উপলক্ষে শনিবাৰে মহানগৰীৰ পানীখাইতিস্থিত প্ৰতীক্ষা নাৰ্ছিং ইনষ্টিটিউটে(Pratiksha Nursing Institute) আয়োজন কৰা বাটৰ নাটৰহে(Street Play) দৃশ্য এয়া ৷
পানীখাইতি বজাৰ চাৰিআলিত প্ৰদৰ্শিত হয় বাটৰ নাটখনি । একবিংশ শতিকা অৰ্থাৎ আজিৰ বিজ্ঞান প্ৰযুক্তিৰ যুগতো একাংশ লোকে অন্ধবিশ্বাসৰ বলি হৈ উপযুক্ত চিকিৎসা গ্ৰহণৰ বিপৰীতে ভণ্ড বাবাৰ চিকিৎসা গ্ৰহণ কৰে ৷ ইয়াৰ বিৰুদ্ধে সজাগতা প্ৰচাৰ কৰাৰ অৰ্থে বাটৰ নাটখনি প্ৰদৰ্শন কৰে প্ৰতিষ্ঠানখনৰ চিকিৎসা কৰ্মীসকলে ৷
প্ৰতিষ্ঠানখনৰ দ্বাৰা আয়োজিত বাটৰ নাটৰ যোগেদি এনে অন্ধবিশ্বাসক পৰিহাৰ কৰি জন সাধাৰণক অভিজ্ঞ ফাৰ্মাচিষ্ট তথা চিকিৎসকৰ ওচৰলৈ যাবলৈ পৰামৰ্শ দিয়া হয় ৷
লগতে পঢ়ক : শীঘ্ৰে গুৱাহাটী মহানগৰীত মুকলি হ'ব আন এখন উৰণীয়া সেঁতু
