গুৱাহাটী,25 এপ্ৰিল: ৰাজ্যত ক’ভিডৰ বিভীষিকা অব্যাহত থকাৰ মাজতেই ক্ৰমাৎ ওচৰ চাপি আহিছে বিধানসভা নিৰ্বাচনৰ ভোট গণনাৰ দিন । 2 মে’ত অনুষ্ঠিত হ’ব ইতিপূৰ্বে অনুষ্ঠিত হৈ যোৱা বিধানসভা নিৰ্বাচনৰ ভোটগণনা । ক’ভিড ত্ৰাসৰ মাজতে যাতে ভোট গণনা সুকলমে অনুষ্ঠিত হয় তাৰ বাবে ৰাজ্যৰ নিৰ্বাচন বিভাগ আৰু স্বাস্থ্য বিভাগ তৎপৰ হৈ পৰিছে ।
ৰাজ্যৰ 126 টা বিধানসভা সমষ্টিৰ ভোট গণনাৰ বাবে বিশেষ পৰ্যবেক্ষক হিচাপে অসমৰ বাহিৰৰ পৰা আগমন ঘটিব 150 গৰাকীকৈ বিষয়াৰ । ভোট গণনাৰ এদিন বা দুদিন পূৰ্বে অসমত উপস্থিত হ’ব বিষয়াসকল । গতিকে স্বাভাৱিকতে এইসকল পৰ্যবেক্ষকৰ ক্ষেত্ৰত বিশেষ নিৰ্দেশনা জাৰি কৰিছে ৰাজ্যৰ স্বাস্থ্য বিভাগে ।
