গুৱাহাটী,১০ ফেব্ৰুৱাৰী: উৎকোচৰ বিৰদ্ধে জেহাদ ঘোষণা কৰিছে অসম আৰক্ষীয়ে । এটাৰ পাচত আনটোকৈ উৎকোচ লোৱাৰ ঘটনা পোহৰলৈ অনা অসম আৰক্ষীয়ে ইতিমধ্যে বহুকেইজন চৰকাৰী বিষয়া-কৰ্মচাৰীক গ্ৰেপ্তাৰ কৰিবলৈ সক্ষম হৈছে । শেহতীয়াকৈ অসম আৰক্ষীয়ে উৎকোচ লোৱাসকলৰ বিৰুদ্ধে অভিযোগ দিবলৈ মুকলি কৰিছে ছটাকৈ ফোন নম্বৰ (Assam Police Phone numbers) । এতিয়াৰে পৰা চৰকাৰী কৰ্মচাৰীয়ে কোনো কামৰ বাবে উৎকোচ বিচাৰিলেই প্ৰত্যক্ষভাৱে দিব পাৰিব অভিযোগ ।
যদি কোনো কর্মচাৰীয়ে কামৰ বিনিময়ত ধন দাবী কৰিছে, তেনেহলে উক্ত দুর্নীতিগ্রস্ত বিষয়া-কৰ্মচাৰীৰ বিৰুদ্ধে নির্ভয়ে অভিযোগ দাখিল কৰিব পাৰিব আৰক্ষীক । আপোনাৰ পৰিচয় গোপনে ৰাখি তেনে দুর্নীতিগ্রস্ত বিষয়া-কৰ্মচাৰীক গ্ৰেপ্তাৰ কৰিব অসম আৰক্ষীৰ দুৰ্নীতি নিৰীক্ষণ আৰু নিবাৰণ সঞ্চালকালয়ে (Vigilance and anti corruption) ।
কেৱল সাধাৰণ চৰকাৰী বিভাগসমূহৰ কৰ্মচাৰীয়েই নহয়, কোনো আৰক্ষীয়েও যদি কিবা কামৰ নামত ধন দাবী কৰে, তেনেহ'লে আৰক্ষীৰ বিৰুদ্ধেও ভিজিলেন্সক ৰাইজে অভিযোগ দিব পাৰিব । দুৰ্নীতিগ্ৰস্ত চৰকাৰী বিষয়া-কৰ্মচাৰীয়ে উৎকোচ বিচাৰিলে গোপনে অভিযোগ দাখিলৰ বাবে ৬ টাকৈ হেল্পলাইন নম্বৰ মুকলি কৰিছে দুর্নীতি নিৰীক্ষণ আৰু নিবাৰণ সঞ্চালকালয়ে (Phone numbers released for complain against bribery) ।
ভিজিলেন্সৰ নৱ-নিযুক্ত এডিজিপি সুৰেন্দ্ৰ কুমাৰে অভিযোগ দাখিল কৰিবলগীয়া ফোন নম্বৰকেইটা ৰাজহুৱা কৰিছে । উক্ত হেল্পলাইন নম্বৰ কেইটা হৈছে ক্ৰমে হোৱাটছএপ নম্বৰ ৬০২৬৯০১২৪৩, ট'লফ্রী ফোন নম্বৰ ১৮০০৩৪৫৩৭৬৭, নিয়ন্ত্ৰণ কক্ষৰ ফোন নম্বৰ ০৩৬১-২৪৬২২৯৫, ভিজিলেন্সৰ আৰক্ষী অধীক্ষকৰ মোবাইল নম্বৰ ৬০২৬৯০৩৪৮৩ আৰু ৬০২৬৯০৩৪৮১ ।
তদুপৰি ভিজিলেন্সৰ অতিৰিক্ত আৰক্ষী অধীক্ষককো ৬০২৬৯০৩৪১৮ নম্বৰত প্ৰত্যক্ষভাৱে অভিযোগ দিব পাৰিব । ইয়াৰোপৰি complaints.vac@gmail.com ই-মেইল আৰু টুইটাৰ একাউণ্ট @DIR VAC ASSAM ত মেছেজযোগে ঘোঁচখোৰ চৰকাৰী কৰ্মচাৰীৰ বিৰুদ্ধে অভিযোগ দিব পাৰিব । উল্লেখ্য যে মুখ্যমন্ত্রী হিমন্ত বিশ্ব শৰ্মাই গৃহ বিভাগৰ দায়িত্ব লোৱাৰ পাচৰে পৰা বিগত বৰ্ষৰ ১৯ অক্টোবৰ পৰ্যন্ত ভিজিলেন্সে ৫৫টা গোচৰ পঞ্জীয়ন কৰি ২ মধ্যভোগীসহ ৬৩ জন চৰকাৰী বিষয়া-কৰ্মচাৰীক গ্ৰেপ্তাৰ কৰিবলৈ সক্ষম হৈছে ।
লগতে পঢ়ক: Ranjit Bora Murder Case : লকআপৰ ভিতৰতে আত্মহননৰ চেষ্টা ৰঞ্জিত বৰা হত্যাকাণ্ডৰ মূল অভিযুক্তৰ
