গুৱাহাটী,20 ফেব্ৰুৱাৰী: বৃহস্পতিবাৰে পুৱা গীতানগৰ থানাত হাজিৰ হয় জ্যেষ্ঠ সাংবাদিক মনজিৎ মহন্ত । তিনিচুকীয়া থানাত ৰাষ্ট্ৰদোহৰ অপৰাধত এক গোচৰ ৰুজু কৰা হৈছিল জ্যেষ্ঠ সাংবাদিকগৰাকীৰ বিৰুদ্ধে । ৰাষ্ট্ৰৰ বিৰুদ্ধে যুদ্ধ ঘোষণা কৰাৰ অভিযোগ আনিছিল মহন্তৰ বিৰুদ্ধে । তিনিচুকীয়া সদৰ থানাত ১৫৮/২০২০ নম্বৰত CrPC ৰ 120 (B), 121 (A), 121, 294, 353, 505, আৰু 34 ৰ অধীনত গোচৰ ৰুজু হৈছিল । বৃহস্পতিবাৰে পুৱা ১১ বজাত গীতানগৰ থানাত হাজিৰ হোৱাৰ বাবে জাননী জাৰী কৰিছিল মহন্তক ।
তেখেত কয় যে, গণতান্ত্ৰিক দেশ এখনত চৰকাৰৰ বিৰুদ্ধে আন্দোলন কৰাটো যদি ৰাষ্ট্ৰদ্ৰোহ হয় তেন্তে তেনে কাৰ্য তেখেতে পুনৰ কৰিব ৷ তেখেতে ৰাষ্ট্ৰৰ বিৰুদ্ধে যুদ্ধ ঘোষণা কৰা সন্দৰ্ভত কয় যে,তেখেত জাতি নাগিৰকত্ব সংশোধনী আইনখনৰ বিৰুদ্ধহে যুদ্ধ ঘোষণা কৰিছে, ৰাষ্ট্ৰৰ বিৰুদ্ধে নহয় ৷ বৰ্তমান চৰকাৰৰ বিৰুদ্ধে গণতান্ত্ৰিক আন্দোলন কৰিলেও ৰাষ্ট্ৰদ্ৰোহ কৰা হয় ৷ এয়া আচলতে চৰকাৰৰ ক্ষড়যন্ত্ৰ ৷ 'কা' বিৰোধী আন্দোলনক মষিমূৰ কৰিবলৈ চৰকাৰে এই আন্দোলনত সক্ৰিয়ভাৱে জড়িত ব্যক্তিসকলক তেওঁলোকৰ বিৰুদ্ধে বিভিন্ন গোচৰ ৰুজু কৰি দমন কৰিব বিচাৰিছে ৷
আনহাতে এই গোচৰ সম্পৰ্কে অৱগত নহয় গীতানগৰ আৰক্ষীৰ ভাৰপ্ৰাপ্ত আৰক্ষী বিষয়া । তিনিচুকীয়া থানালৈ গীতানগৰ আৰক্ষীয়ে ফোন কৰাত তিনিচুকীয়া থানাত হাজিৰ হ'ব লাগিব বুলি কয় । ভুলবশতঃ গীতানগৰ থানালৈ মতা বুলি জাননী জাৰি কৰা বুলি স্বীকাৰ কৰে তিনিচুকীয়া আৰক্ষীয়ে । পৰৱৰ্তী সময়ত পুনৰ জাননী জাৰি কৰিব তিনিচুকীয়া সদৰ আৰক্ষীয়ে।
লগতে পঢ়ক:অসম চু্ক্তিৰ 6 নং দফা কাৰ্যকৰীকৰণৰ বাবে আগ্ৰহী নহয় অমিত শ্বাহ
