মহানগৰীত ছাত্ৰ মুক্তি সংগ্ৰাম সমিতিৰ মানৱ শৃংখল কাৰ্যসূচী

কৃষক নেতা অখিল গগৈৰ মুক্তি আৰু নাগৰিকত্ব সংশোধনী আইন বাতিলৰ দাবীত ছাত্ৰ মুক্তি সংগ্ৰাম সমিতিৰ মানৱ শৃংখল কাৰ্যসূচী ৷ সংগঠনটোৰ শতাধিক কৰ্মকৰ্তাই বিভিন্ন প্ৰতিবাদী শ্ল’গানেৰে উত্তাল কৰিলে প্ৰতিবাদস্থলী ৷ অখিল গগৈ চৰকাৰী ষড়যন্ত্ৰৰ বলি হোৱাৰ অভিযোগ ছাত্ৰ মুক্তি সংগ্ৰাম সমিতিৰ ।

গুৱাহাটী, ২৪ ডিচেম্বৰ: ৰাজ্যৰ ভিন্ন প্ৰান্তৰ সমান্তৰালকৈ বৃহস্পতিবাৰে গুৱাহাটীৰ ৰ'টাৰী ক্লাবতো ছাত্ৰ মুক্তি সংগ্ৰাম সমিতিৰ কামৰূপ মহানগৰ জিলা সমিতিৰ উদ্যোগত মানৱ শৃংখল কাৰ্যসূচী ৰূপায়ণ কৰা হয় । নাগৰিকত্ব (সংশোধনী) আইন ২০১৯ বাতিল আৰু কৃষক নেতা অখিল গগৈৰ মুক্তিৰ দাবীত প্ৰতিবাদী মানৱ শৃংখল কাৰ্যসূচী ৰূপায়ণ কৰে সংগঠনটোৱে ৷

প্ৰতিবাদী কাৰ্যসূচীৰ জৰিয়তে সম্প্ৰতি কাৰাৰুদ্ধ হৈ থকা অখিল গগৈৰ লগতে আন সকলো আন্দোলনকাৰী নেতাক বিনা চৰ্তে মুকলি কৰি দিয়াৰ দাবী জনায় ছাত্ৰ মুক্তিৰ সদস্য সকলে ৷ প্ৰতিবাদকাৰীসকলে নাগৰিকত্ব (সংশোধনী) আইনৰ বিৰোধিতা কৰি কয় যে, 'আমি আগতেও 'কা' মানি লোৱা নাছিলো আৰু এতিয়াও নলও ৷ আমি কোনো কাৰণতে বাংলাদেশীৰ বোজা ব'ব নোৱাৰো ৷'

লগতে সংগঠনটোৰ সদস্যসকলে যোৱা বছৰৰ 'কা' আন্দোলনৰ প্ৰসংগ উত্থাপন কৰি স্পষ্ট কৰি দিয়ে যে, আইনখন বাতিল নকৰা পৰ্যন্ত তেওঁলোকে প্ৰতিবাদ অব্যাহত ৰাখিব । জাতিধ্বংসী আইনৰ বিৰোধিতাৰে চলিত বৰ্ষৰ ডিচেম্বৰ মাহৰ শেষৰ সপ্তাহটো 'কা' বিৰোধী সপ্তাহ হিচাপে পালন কৰাৰ সিদ্ধান্ত গ্ৰহণ লৈছে সংগঠনটোৱে ৷ 'কা' বিৰোধী সপ্তাহ উপলক্ষে অসমৰ বিভিন্ন স্থানত চাইকেল ৰেলী, জোঁৰ সমদল আৰু ৰাইজ মেল অনুষ্ঠিত কৰিব ছাত্ৰ মুক্তি সংগ্ৰাম সমিতিয়ে ।

লগতে পঢ়ক:বাংলাদেশৰ ইলিছেৰে অতিথি আপ্যায়ন কৰিমগঞ্জৰ বিজেপিৰ কাৰ্যনিৰ্বাহকত