শপত গ্ৰহণৰ বাবে সাজু ৰাজভৱন: অনিশ্চয়তাত শপত লওতাৰ নাম

ৰাজ্যৰ ৰাজনীতিত অব্যাহত আছে মুখ্যমন্ত্ৰীকেন্দ্ৰীক চৰ্চা ৷ মুখ্যমন্ত্ৰী পদৰ শপত গ্ৰহণৰ বাবে ইতিমধ্যে সাজু হৈছে ৰাজভৱন ৷ কিন্তু এতিয়াও নিশ্চিত হোৱা নাই, প্ৰকৃতাৰ্থত কোনে অলংকৃত কৰিব আগন্তুক পাঁচ বছৰৰ বাবে অসমৰ মুখ্যমন্ত্ৰীৰ আসন ৷

গুৱাহাটী, ৬ মে' : অসমৰ ৰাজনৈতিক ইতিহাসত এনে ঘটনা কেতিয়াও ঘটা নাছিল । চৰকাৰ গঠন কৰিব পৰা জোখাৰে আসন লাভ কৰাৰ পাচতো ফলাফল ঘোষণাৰ পাঁচ দিন উকলি যোৱা স্বত্বেও চৰকাৰ গঠন কৰিবলৈ সক্ষম হোৱা নাই 'মহাপ্ৰতাপী' বিজেপি দলে । কাৰণ এটাই - দ্বিতীয়টো কাৰ্যকালৰ বাবে গঠন হ'ব লগীয়া বিজেপি নেতৃত্বাধীন চৰকাৰখনৰ মুখ্যমন্ত্ৰীৰ আসনত কোন বহিব সেয়া বিগত চাৰি দিনে চূড়ান্ত কৰিব পৰা নাই বিজেপিৰ ৰাষ্ট্ৰীয় নেতৃত্বই ।

দলৰ ৰাষ্ট্ৰীয় সভাপতি জে পি নাড্ডা যোৱা দুদিন ধৰি ব্যস্ত হৈ আছে পশ্চিমবংগত । বৃহস্পতিবাৰে তেওঁ দিল্লীলৈ উভতি যোৱাৰ পাচতহে মুখ্যমন্ত্ৰী কোন হ'ব সেয়া বিজেপিৰ সংসদীয় ব'ৰ্ডৰ সভাই চূড়ান্ত কৰি আনুষ্ঠানিকভাৱে ঘোষণা কৰাৰ সম্ভাৱনা আছে ।

ইফালে মুখ্যমন্ত্ৰীকেন্দ্ৰীক চৰ্চা অব্যাহত থকাৰ মাজতে ৰাজ্যৰ মুখ্য সচিব জিষ্ণু বৰুৱাই কাইলৈ অৰ্থাৎ শুকুৰবাৰে শপত গ্ৰহণৰ বাবে সাজু হ'বলৈ বুলি ইতিমধ্যে ৰাজভৱনলৈ বাৰ্তা প্ৰেৰণ কৰিছে । দিছপুৰৰ কৰ্তৃত্বশালী সূত্ৰই ই টিভি ভাৰতৰ আগত আজি পুৱা সদৰী কৰিছে এই কথা । কিন্তু শপত গ্ৰহণৰ বাবে ৰাজভৱন সাজু হ'লেও আমোদজনক কথাটো হ'ল এইয়ে যে, শপত লওতাজন কোন হ’ব সেয়া এই পৰ্যন্ত নিশ্চিত হোৱা নাই ।

লগতে পঢ়ক: গুৱাহাটীৰ 3 টা ৱাৰ্ডত কণ্টেইনমেন্ট জ'ন ঘোষণা