নিউজ ডেস্ক,14 ফ্ৰেব্ৰুৱাৰীঃ আজিৰ দিনটোতে সন্ত্ৰাসবাদীৰ আক্ৰমণত পুলৱামাত শ্বহীদ হৈছিল 40 জন ভাৰতীয় জোৱান ৷ উল্লেখযোগ্য যে, জম্মু–শ্ৰীনগৰ সংযোগী ৰাষ্ট্ৰীয় ঘাইপথত চিআৰপিএফৰ কনভয়ৰ ওপৰত চলিছিল সেই ভয়ংকৰ সন্ত্ৰাসবাদীৰ আক্ৰমণ ।
2019 চনৰ 14 ফেব্ৰুৱাৰীৰ দিনটোত সংঘটিত হৈছিল এক আত্মঘাতী আক্ৰমণ ৷ এই আক্ৰমণৰ দায়িত্ব স্বীকাৰ কৰে পাকিস্তানৰ ইছলামিক সন্ত্ৰাসবাদী সংগঠন জইছ-ই-মহম্মদে ৷ সংগঠনটোৰ সন্ত্ৰাসবাদী আদিল আহমেদ ডাৰে এখন বিস্ফোৰক ভৰ্তি বাহনেৰে চিআৰপিএফৰ কনভয়ৰ বাহনত খুন্দিওৱাৰ ফলত উক্ত বিস্ফোৰণটো সংঘটিত হৈছিল ।
জম্মু-কাশ্মীৰৰ পুলৱামা জিলাৰ অৱন্তীপুৰৰ লেথপুৰ অঞ্চলত সংঘটিত হৈছিল এই আক্ৰমণ । এই আত্মঘাতী আক্ৰমণত কেন্দ্ৰীয় সংৰক্ষিত আৰক্ষী বাহিনীৰ জোৱান নিহত হৈছিল । আজি সমগ্ৰ দেশজুৰি সেই ভয়াৱহ আক্ৰমণত শ্বহীদ হোৱা বীৰ জোৱানসকলক সকলোৱে শ্ৰদ্ধাৰে সোঁৱৰণ কৰিছে ৷ ইটিভি ভাৰতৰ তৰফৰ পৰাও সেই ভয়াৱহ আক্ৰমণত শ্বহীদ হোৱা বীৰ যোদ্ধাসকললৈ গভীৰ শ্ৰদ্ধাঞ্জলি জ্ঞাপন কৰিলো ৷
