গুৱাহাটী, ৬ ফেব্ৰুৱাৰী : সাত দিনৰ আৰক্ষী জিম্মালৈ প্ৰেৰণ কৰা হ’ল ৰঞ্জিৎ বৰা হত্যাকাণ্ডৰ (Ranjit Bora Murder Case) মূল অভিযুক্ত শ্বাহ আলম তালুকদাৰক ৷ সোমবাৰে আদালত হাজিৰ কৰোৱাত আৰক্ষীয়ে 14 দিনৰ জিম্মাত বিচাৰিছিল শ্বাহ আলমক তালুকদাৰক ৷ ইয়াৰ পাছতে আদালতে শ্বাহ আলমক সাত দিনৰ আৰক্ষীৰ জিম্মাত দিয়ে আৰু অধিক জেৰাৰ বাবে আৰক্ষীৰ অপৰাধ শাখালৈ লৈ যোৱা হয় ৰঞ্জিৎ বৰা হত্যাকাণ্ডৰ মূল অভিযুক্ত শ্বাহ আলমক ৷
ৰাজ্য কঁপাই যোৱা ৰঞ্জিৎ বৰা হত্যাকাণ্ডৰ লগত জড়িত মূল অভিযুক্তসহ 5 টাকৈ ডকাইতক গুৱাহাটী মহানগৰ আৰক্ষী, কামৰূপ আৰক্ষী আৰু নলবাৰী আৰক্ষীৰ যুটীয়া অভিযানত গ্ৰেপ্তাৰ কৰা হৈছে ৷ উক্ত ডকাইতকেইটাই 21 নৱেম্বৰৰ দিন দুপৰতে পাঞ্জাবাৰীৰ ৰাজপথত পূৰবী ডেইৰীৰ বিতৰক ৰঞ্জিৎ বৰাক গুলীয়াই হত্যা কৰি লুটি নিছিল 2 লাখ 45 হাজাৰ টকা (Purabi Dairy distributor Ranjit Bora murder) ৷
পাঞ্জাবাৰীৰ এক্সেল একাডেমীৰ (Excel Academy Panjabari) স্বত্বাধিকাৰী শ্বাহ আলম তালুকদাৰেই ৰঞ্জিৎ বৰাক গুলীয়াই হত্যা কৰিছিল ৷ আৰক্ষীয়ে শ্বাহ আলমক গ্ৰেপ্তাৰ কৰাৰ পাছত জেৰাত পোহৰলৈ আহিছে ন ন তথ্য ৷ শ্বাহ আলমে 2019 চনত 11 মাহৰ চুক্তিৰে গুৱাহাটীৰ পাঞ্জাবাৰীত এটা ঘৰ ভাৰালৈ লৈ এক্সেল একাডেমি নামৰ ব্যক্তিগত শিক্ষানুষ্ঠানখন চলাই আছিল ৷ চুক্তি শেষ হোৱাৰ পাছতো ঘৰ খালী কৰি নিদিয়াৰ লগতে ঘৰৰ মালিকক ভয় ভাবুকি প্ৰদান কৰি আহিছিল শ্বাহ আলম নামৰ ডকাইতটোৱে ৷
কেইবাবাৰো ঘৰৰ মালিকে সাতগাঁও থানাত অভিযোগ দিও সঁহাৰি নোপোৱাত সমগ্ৰ ঘটনাটোৰ সন্দৰ্ভত মুখ্যমন্ত্ৰী ড৹ হিমন্ত বিশ্ব শৰ্মাক (CM Himanta Biswa Sarma) অৱগত কৰোৱাইছিল ৷ ইফালে বৰ্তমানলৈকে ঘৰটোৰ বাবদ মালিকক প্ৰায় ১৩ লাখ টকা ভাড়া আদায় দিবলৈ আছে বুলি জানিব পৰা গৈছে ৷
উল্লেখ্য যে, ইতিমধ্যে ৰঞ্জিৎ বৰা হত্যাকাণ্ডৰ লগত জড়িত মূল অভিযুক্ত শ্বাহ আলম তাদুকদাৰসহ ৫ ডকাইতক গ্ৰেপ্তাৰ কৰিছে আৰক্ষীয়ে । ধৃত আনকেইটা ডকাইত ক্ৰমে সুজল আলী (২৭), জয়দেৱ মহন্ত (৪০), জিতুমণি বৰ্মন(৩৭) আৰু হৰেন পাটগিৰি ৷ আৰক্ষীৰ অভিযানত ইতিমধ্যে উদ্ধাৰ হৈছে হত্যাকাণ্ডত ব্যৱহৃত মটৰ চাইকেল, হেলমেট আৰু কাপোৰ ৷ ছজনীয়া ডকাইতৰ দলটো কেইবাটাও ডকাইতি কাণ্ডৰ লগত জড়িত বুলি মহানগৰ আৰক্ষী আয়ুক্ত দিগন্ত বৰাই সংবাদমেলযোগে প্ৰকাশ কৰিছে ৷
লগতে পঢ়ক: Lahowal Rape Case : লাহোৱালৰ ধৰ্ষণকাণ্ডৰ লগত জড়িত মহিলাসহ দুই যুৱককক আদালতলৈ প্ৰেৰণ
