গুৱাহাটী, ৭ মে’: দিছপুৰ মহাবিদ্যালয়ৰ ধন হৰলুকি হোৱা ঘটনাৰ কেতবোৰ চাঞ্চল্যকৰ তথ্য পোহৰলৈ আহিছে । বেংক কৰ্তৃপক্ষই স্বীকাৰ কৰিছে নিজৰ গাফিলতিৰ কথা । হৰলুকি হোৱা ৭৬ লাখ টকা মহাবিদ্যালয় কৰ্তৃপক্ষক অতি শীঘ্ৰে ঘূৰাই দিব বুলি পত্ৰ প্ৰেৰণ কৰিছে বেংক কৰ্তৃপক্ষই ।
এই বিষয় সন্দৰ্ভত শনিবাৰে মহানগৰীৰ উপ-আৰক্ষী আয়ুক্ত (ইষ্ট) সুধাকৰ সিঙে সংবাদ মাধ্যমৰ আগত কয় যে, পূৰ্বৰ এখন চেকৰ জৰিয়তে উলিওৱা হৈছে হৰলুকি হোৱা ধনৰাশি । অন্য এক কামৰ বাবে দিছপুৰ মহাবিদ্যালয়ে ৩৮০০ টকাৰ এখন চেক প্ৰদান কৰিছিল । সেই ৩৮০০ টকাৰ চেকৰ ক্ৰমিক নম্বৰৰ মিল আছে হৰলুকি কৰা ধনৰাশিৰ চেকৰ নম্বৰ সৈতে ৷ ইতিমধ্যেই আটকাধীন বেংকৰ মুখ্য শাখা মেনেজাৰসহ দুগৰাকী বেংক বিষয়াক চৰ্তসাপেক্ষে যাবলৈ দিয়া হৈছে বুলি মন্তব্য কৰে সুধাকৰ সিঙে (Bank manager detained in cheque fraud case of Dispur college)।
সমগ্ৰ ঘটনা সন্দৰ্ভত অব্যাহত ৰখা হৈছে তদন্ত ৷ এই ঘটনাৰ লগত মহাবিদ্যালয়ৰ কৰ্মচাৰী তথা বেংকৰ কোনো কৰ্মচাৰী জড়িত থাকিলে তেওঁলোকৰ বিৰুদ্ধে কঠোৰ ব্যৱস্থা লোৱা হ'ব বুলি মন্তব্য কৰে উপ-আৰক্ষী আয়ুক্তগৰাকীয়ে । উল্লেখ্য যে, বেংক অব্ বৰোদাৰ দিছপুৰ শাখাত থকা মহাবিদ্যালয়খনৰ একাউন্টৰ পৰা আৰ টি জি এছ যোগে ইউনিয়ন বেংকৰ বৰানগৰ শাখালৈ ট্ৰেন্সফাৰ হৈছিল ৭৬ লাখ টকা (Cyber thief stolen money of Dispur College)। এই কথা পোহৰলৈ অহাৰ পাছতে মহাবিদ্যালয়খনৰ কৰ্তৃপক্ষই ঘটনা সন্দৰ্ভত দিছপুৰ আৰক্ষী থানাত দাখিল কৰিছিল এজাহাৰ । আৰক্ষীয়ে ১০৯৪/২২ নম্বৰত ১২০ বি/২০৯/৪৬৮/ ৪৬৭/৪২০/৪৭১ ধাৰাত গোচৰ ৰুজু কৰি অব্যাহত ৰাখিছে তদন্ত ।
লগতে পঢ়ক: চেক নকল কৰি কোনে সৰকালে দিছপুৰ মহাবিদ্যালয়ৰ একাউন্টৰ ৭৬ লাখ টকা ?
