গুৱাহাটী, 14 এপ্ৰিল : এদিনীয়া বিস্তৃত কাৰ্যসূচীৰে আজি গুৱাহাটীলৈ আহিব প্ৰধানমন্ত্রী নৰেন্দ্ৰ মোডী । প্ৰধানমন্ত্রী মোডীয়ে আজি 14 হাজাৰ কোটি টকাৰো অধিক ব্যয়ৰে কেইবাটাও প্ৰকল্প মুকলি কৰাৰ লগতে কেইবাটাও প্ৰকল্পৰ আধাৰশিলা স্থাপন কৰিব । লগতে 11 হাজাৰৰো অধিক বিহুৱা-বিহুৱতীৱে একেটা স্থানতে প্ৰদৰ্শন কৰিবলগীয়া বিহুনাচো উপভোগ কৰিব । কাৰ্যসূচী অনুসৰি আজি দিনৰ প্ৰায় 11.30 বজাত প্ৰধানমন্ত্রী নৰেন্দ্ৰ মোডী গুৱাহাটীৰ বৰঝাৰস্থিত বিমানবন্দৰত উপস্থিত হ'ব । তাৰ পৰা হেলিকপ্টাৰেৰে আই আই টি গুৱাহাটীত উপস্থিত হৈ চাংসাৰিৰ এইমছ গুৱাহাটীত আয়োজন কৰা অনুষ্ঠানত অংশগ্ৰহণ কৰিব (Modi Assam visit) ।
1123 কোটি টকা ব্যয় সাপেক্ষে নিৰ্মাণ কৰা 750 খন বিছনাযুক্ত এইমছ গুৱাহাটী আজি প্ৰধানমন্ত্রীয়ে আনুষ্ঠানিকভাৱে উদ্বোধন কৰিব । উক্ত অনুষ্ঠানতে প্ৰধানমন্ত্রীয়ে ভাৰ্চুৱেলি নগাঁও, কোকৰাঝাৰ আৰু নলবাৰী মেডিকেল কলেজো মুকলি কৰিব । উল্লেখ্য যে, নলবাৰী মেডিকেল কলেজ ৬১৫ কোটি টকা, নগাঁও মেডিকেল কলেজ ৫৬০ কোটি টকা আৰু কোকৰাঝাৰ মেডিকেল কলেজ ৫৩৫ কোটি টকা ব্যয় সাপেক্ষে নিৰ্মাণ কৰি উলিওৱা হৈছে । আনহাতে এইমছ গুৱাহাটীৰ পৰাই প্ৰধানমন্ত্রীয়ে প্ৰধানমন্ত্রীৰ আয়ুষ্মান ভাৰত আৰু মুখ্যমন্ত্ৰীৰ আয়ুষ্মান অসম আঁচনি অনুসৰি ১ কোটি ১০ লাখ মানুহৰ বাবে আয়ুষ্মান কাৰ্ড মুকলি কৰিব । প্ৰধানমন্ত্ৰীগৰাকীয়ে প্ৰতীকী ৰূপত বিতৰণ কৰিব এই কাৰ্ড । ১০ মে'ত মুখ্যমন্ত্রী হিমন্ত বিশ্ব শৰ্মা চৰকাৰৰ দুবছৰ পূৰ্তি উপলক্ষ্যে আয়ুষ্মান অসম আঁচনিখন কাৰ্যকৰী কৰা হ'ব (Assam’s 3 medical College Hospital inauguration)।
আনহাতে প্ৰধানমন্ত্রীয়ে এইমছৰ পৰাই আই আই টি গুৱাহাটী আৰু অসম চৰকাৰৰ মাজত হোৱা বুজাবুজিৰ সিদ্ধান্ত মৰ্মে নিমাৰ্ণ কৰিবলগীয়া 'আৰ্হি' নামৰ অত্যাধুনিক প্ৰতিষ্ঠানখনৰ আধাৰশিলা স্থাপন কৰিব । ৬০০ কোটি টকা ব্যয় সাপেক্ষে আই আই টি গুৱাহাটী চৌহদত নিৰ্মাণ কৰিবলগীয়া এই প্ৰতিষ্ঠানখনত স্বাস্থ্য সেৱাৰ লগতে হেল্থ ইঞ্জিনিয়াৰিং উপলব্ধ হ'ব । এইমছৰ পৰা হেলিকপ্টাৰযোগে প্ৰধানমন্ত্রী দিনৰ ১.৪৫ বজাত খানাপাৰাৰ খেলপথাৰত উপস্থিত হৈ কলাক্ষেত্রলৈ যাব । কলাক্ষেত্রত প্ৰধানমন্ত্রীয়ে গুৱাহাটী উচ্চ ন্যায়ালয়ৰ হীৰক জয়ন্তী অনুষ্ঠানৰ সামৰণি অনুষ্ঠানত অংশ গ্ৰহণ কৰি ভাষণ আগবঢ়াব । কলাক্ষেত্রৰ অনুষ্ঠানৰ পাছত প্ৰধানমন্ত্রীয়ে আধাঘণ্টা সময় কইনাধৰাৰ ৰাজ্যিক অতিথিশালাত জিৰণি ল'ব । কইনাধৰাৰ পৰা প্ৰধানমন্ত্রী ৪.৩০ বজাত সৰুসজাই ষ্টেডিয়াম অভিমুখে যাত্রা কৰিব । সৰুসজাই ষ্টেডিয়ামত ৪.৪৫ বজাৰ পৰা অনুষ্ঠান আৰম্ভ হ'ব আৰু প্ৰধানমন্ত্রীয়ে সৰুসজাইত কেইবাটাও আঁচনি মুকলি কৰিব বুলি জানিবলৈ পৰা গৈছে (Largest Bihu dance performance in Guwahati) ।
সৰুসজাইৰ পৰা প্ৰধানমন্ত্ৰীয়ে ভাৰ্চুৱেলি নামৰূপৰ ৫০০ টিপিডি মিথানেল প্ৰকল্পৰ শুভাৰম্ভণি কৰিব । ১৭০৯ কোটি টকা ব্যয় সাপেক্ষৰ এই প্ৰকল্পটোৰ ৫১ শতাংশ ব্যয় অসম চৰকাৰৰ আৰু ৪৯ শতাংশ ব্যয় অইল ইণ্ডিয়াৰ । তদুপৰি প্ৰধানমন্ত্ৰীয়ে ভাৰ্চুৱেলি ১০০ কোটি টকা ব্যয় সাপেক্ষে ৰংঘৰৰ সৌন্দৰ্যবৰ্ধনৰ বাবে লোৱা আঁচনিৰ কামৰো শুভাৰম্ভ কৰিব । দুয়োটা কাৰ্যসূচীৰ পিছত ব্ৰহ্মপুত্ৰৰ ওপৰত স্থাপন হ'বলগীয়া পলাশবাৰী-শুৱালকুছি সংযোগী দলঙৰ আধাৰশিলাও প্ৰধানমন্ত্রীয়ে ভাৰ্চুৱেলি স্থাপন কৰিব । ৩১৯৭ কোটি টকা ব্যয় সাপেক্ষে দলঙখন নিৰ্মাণ কৰা হ'ব (PM Modi to inaugurates Methanol project) ।
সৰুসজাইৰ পৰাই প্ৰধানমন্ত্রীয়ে উত্তৰ পূব সীমান্তৰ প্ৰায় ৭০০০ কোটি টকা ব্যয়ৰে কেইবাটাও প্ৰকল্প উদ্বোধন কৰিব । ইয়াৰ ভিতৰত আছে ডিগাৰু-লামডিং দ্বৈত ৰেলপথ, গৌৰীপুৰ-অভয়াপুৰী নতুন ৰেলপথ, নিউ বঙাইগাঁও-ধূপধৰা দ্বৈত ৰেলপথ, জলফাইগুৰি-গুৱাহাটী সংযোগী ৰেলপথৰ বৈদ্যুতিকৰণ আৰু শিলঘাট-মৈৰাবাৰী ৰেলপথ মুকলি । এইসমূহ কাৰ্যসূচীৰ পাচতে সৰুসজাই ষ্টেডিয়ামত অনুষ্ঠিত হ'ব বিহুনাচৰ বিশাল অনুষ্ঠানটো ।
সৰুসজাইত ১১ হাজাৰৰো অধিক বিহুৱা আৰু বিহুৱতীয়ে প্ৰধানমন্ত্ৰীৰ সন্মুখত প্ৰদৰ্শন কৰিব বিহুনাচ । প্ৰধানমন্ত্রীৰ উপস্থিতিত অসমীয়াৰ বিহুৱে লাভ কৰিব বিশ্বজনীন কৃতিত্ব । আনহাতে প্ৰধানমন্ত্রীৰ উপস্থিতিতে বিহুনাচ আৰু ঢোলবাদনে লাভ কৰা গীনিজ বুক অৱ ৱৰ্ল্ড ৰেকৰ্ডছৰ প্ৰমাণ পত্র কৰ্তৃপক্ষই আনুষ্ঠানিকভাৱে প্ৰদান কৰিব । উল্লেখ্য যে বিশ্ব অভিলেখৰ বাবে বিহুনাচ প্ৰদৰ্শন আৰু ঢোল বাদনৰ অনুষ্ঠানটো ১৩ এপ্ৰিলত সৰুসজাই ষ্টেডিয়ামত অনুষ্ঠিত কৰা হৈছিল । বিহুনাচৰ বিশাল অনুষ্ঠানটো উপভোগ কৰাৰ পাছতে প্ৰধানমন্ত্রীগৰাকীয়ে ৰাজ্যবাসীক উদ্দেশ্যি ভাষণ আগবঢ়াব আৰু 14 এপ্ৰিলৰ বিয়লিৰ ভাগত দিল্লীলৈ উৰা মাৰিব ।
লগতে পঢ়ক : Protest in Guwahati : ৰঙালী বিহুৰ প্রাক্ ক্ষণত চচলত অনশনত বহিল শিলসাঁকোৰ উচ্ছেদিত ৰাইজ
