গুৱাহাটী, ৭ জুন: ২০২৪ ৰ লোকসভা নিৰ্বাচনৰ বাবে মিত্ৰতাক লৈ অসমত চলিছে বিৰোধীৰ ব্যাপক তৎপৰতা ৷ কংগ্ৰেছৰ নেতৃত্বত ১১ টা সৰু-বৰ ৰাজনৈতিক শক্তিয়ে আৰম্ভ কৰিছে কচৰৎ । ইয়াৰে অংশ স্বৰূপে ইতিমধ্যে তেজপুৰত কংগ্ৰেছৰে বৈঠকতো বহিছে অসম জাতীয় পৰিষদ আৰু ৰাইজৰ দল ৷ দুয়োদলে নিজৰ স্থিতি স্পষ্ট কৰি মিত্ৰতাৰ বল এতিয়া ঠেলি দিলে কংগ্ৰেছৰ ক’ৰ্টলৈ ৷ তাৰ পিচতে এই মিত্ৰতাৰ সাম্ভাব্য প্ৰভাৱ আৰু ৰূপায়ণক লৈ কেতবোৰ ৰাজনৈতিক প্ৰশ্ন উত্থাপিত হৈছে (Opposition alliance in Assam) ৷
প্ৰশ্ন উঠিছে, সঁচাকৈয়ে মিত্ৰতাৰ ধৰ্ম ৰক্ষা কৰি মিত্ৰ দলক সন্তুষ্ট কৰি আগবাঢ়ি যাব পাৰিবনে কংগ্ৰেছে ? কংগ্ৰেছৰ নেতৃত্বত সমাগত লোকসভা নিৰ্বাচনক কেন্দ্ৰ কৰি তেজপুৰত অসম জাতীয় পৰিষদ আৰু ৰাইজৰ দল বৈঠকত মিলিত হোৱাৰ পিচতে বিষয়টোৱে লাভ কৰিছে বিশেষ চৰ্চা ৷ সৰ্বভাৰতীয় পৰ্যায়তো বিৰোধী ঐক্য গঠনৰ কুচকাৱাজ চলি আছে নীতিশ কুমাৰৰ নেতৃত্বত ৷ তাৰ মাজতেই অসমত তৎপৰ হোৱা দেখা গৈছে প্ৰদেশ কংগ্ৰেছৰ সভাপতি ভূপেন বৰা (APCC alliance with AJP) ৷
ভূপেন বৰাৰ আমন্ত্ৰণ মৰ্মে সোমবাৰে তেজপুৰত উপস্থিত হ’ল অসম জাতীয় পৰিষদ আৰু ৰাইজৰ দলৰ নেতৃত্ব ৷ দুয়োটা নৱ গঠিত আঞ্চলিক ৰাজনৈতিক দলৰ সভাপতি অখিল গগৈ আৰু লুৰীণজ্যোতি গগৈৰে বৈঠকত মিলিত হ’ল প্ৰদেশ কংগ্ৰেছৰ সভাপতি ভূপেন বৰা, বিৰোধী দলপতি দেবব্ৰত শইকীয়া আৰু উপ দলপতি ৰকিবুল হুছেইন ৷ স্বাভাৱিকতে বৈঠকৰ বিষয় আছিল লোকসভা নিৰ্বাচনত বিৰোধী ঐক্য ৷ বৈঠকৰ পাচত তিনিওটা দলৰ নেতৃত্বৰ ঐকমত্যত উপনীত হৈছে (APCC Raijor Dal alliance) ৷
লগতে পঢ়ক: Assam political updates: যিকোনো পৰিস্থিতিত আজমলক আদৰি ল’বলৈ বিমত বিজেপি বিৰোধী ঐক্য মঞ্চ
- বিৰোধী ঐক্যই পৰাজিত কৰিব পাৰিব বিজেপিক
- বিজেপিৰ বিৰুদ্ধে বিৰোধীৰ এজনকৈ প্ৰাৰ্থীৰ পোষকতা
- ২০২৪ য়েই হ’ব বিৰোধীৰ আত্মৰক্ষাৰ শেষ সুযোগ
এ আই চি চিৰ পৰামৰ্শমতেই এই আলোচনা অনুষ্ঠিত হোৱা বুলি মন্তব্য কংগ্ৰেছ সভাপতি ভূপেন বৰাৰ ৷ তিনিওটা দলৰ নেতৃত্বই বিৰোধী ঐক্যৰ সিদ্ধান্তত ঐক্যমতত উপনীত হৈছে যদিও আসন বুজা পৰাৰ দিশত বিৰোধী ঐক্যত এতিয়াও আছে কিছু জটিলতা ৷ এনে জটিলতাৰ বাবেই ২০২১ চনৰ বিধানসভা নিৰ্বাচনত সম্ভৱপৰ হৈ নুঠিল কংগ্ৰেছ, অসম জাতীয় পৰিষদ আৰু ৰাইজৰ দলৰ মিত্ৰতা ৷ সেইবাবে বিৰোধী এতিয়াও সমালোচিত হয় ৷ বিৰোধী একত্ৰিত নোহোৱাৰ বাবেই অসমত বিজেপি দল পুনৰ শাসনলৈ অহা বুলি চৰ্চা চলা দেখা যায় (Opposition parties in Assam) ৷
ইতিমধ্যেই ৰাইজৰ দলৰ সভাপতি অখিল গগৈয়ে মন্তব্য কৰিছে যে, ডিব্ৰুগড় লোকসভা সমষ্টিত এইবাৰ লোকসভাত সকলো বিৰোধী মিলি এজনেই প্ৰাৰ্থী প্ৰক্ষেপ কৰিব ৷ বিৰোধীৰ উমৈহতীয়া শক্তিৰূপে নাম চৰ্চিত হৈছে অসম জাতীয় পৰিষদৰ সভাপতি লুৰীণজ্যোতি গগৈৰ ৷ ইয়াকে লৈ কংগ্ৰেছৰ ডিব্ৰুগড় লোকসভা সমষ্টিৰ প্ৰাৰ্থিত্ব প্ৰত্যাশী সকলৰ মাজত ব্যাপক বিৰোধিতাৰ উদ্ভৱ হোৱাৰ খবৰো পোৱা গৈছে (Lok Sabha election news) ৷
লগতে পঢ়ক: Assam congress alliance : কংগ্ৰেছৰ পৰিকল্পনাই বিৰোধী ঐক্যত আউল লগোৱাৰ সম্ভাৱনা !
কংগ্ৰেছ নেতৃত্বই জনোৱা মতে, এইবাৰ কংগ্ৰেছৰ উদ্যোগত আগতীয়াকৈ আৰম্ভ হৈছে বিৰোধী ঐক্য গঠনৰ প্ৰস্তুতি ৷ কিন্তু আসন বুজাবুজিৰে বিৰোধীক সৈমান কৰাৰ দায়িত্বও এতিয়া কংগ্ৰেছৰ ক’ৰ্টত ৷ মিত্ৰ দলক প্ৰাধান্য দি মিত্ৰতাৰ ধৰ্ম কিমান দূৰলৈ কংগ্ৰেছে পালন কৰিব তাৰ প্ৰতি বিৰোধী আৰু শাসকীয় সকলো ৰাজনৈতিক শক্তিয়ে ৰাখিছে পূৰ্ণ দৃষ্টি ৷
