গুৱাহাটী,25 এপ্ৰিল: ক'ভিড আক্ৰান্ত ৰোগীৰ হোম কোৱাৰেণ্টাইনৰ ক্ষেত্ৰত শনিবাৰে বিয়লি ৰাজ্যৰ স্বাস্থ্য বিভাগে জাৰি কৰিছে কেতবোৰ কঠোৰ বিধি নিয়ম (এছ অ' পি) । স্বাস্থ্য বিভাগৰ প্ৰধান সচিব সমীৰ সিনহাই জাৰি কৰা এই নতুন এছ অ' পি মতে হোম কোৱাৰেণ্টাইনত থকা কোনো লোক যদি নিজৰ ঘৰৰ পৰা ওলাই চলা-ফুৰা কৰে, তেন্তে তেওঁৰ বিৰুদ্ধে পূৰ্বতকৈও কঠোৰ হ’ব চৰকাৰ ।
সেই অনুসৰি গাঁও, চহৰ, নগৰ সকলো অঞ্চলতে জিলা উপায়ুক্ত বা কৰ্তৃত্বশালী বিষয়াই স্থানীয় লোকক লৈ একোখনকৈ সমিতি গঠন কৰি দিব । সংশ্লিষ্ট অঞ্চলৰ হোম কোৱাৰেণ্টাইনত থকা কোনো লোকে যদি নিয়ম ভংগ কৰি ঘৰৰ বাহিৰলৈ ওলাই আহে কিম্বা চলা-ফুৰা কৰে তেন্তে তেনে লোকৰ বিৰুদ্ধে আৰক্ষীৰ জৰিয়তে ব্যৱস্থা গ্ৰহণ কৰাৰ পূৰ্ণ কৰ্তৃত্ব থাকিব তেনে সমিতিসমূহৰ ।
প্ৰতিটো তেনে অঞ্চলৰ এনজিঅ'ৰ প্ৰতিনিধি, অৱসৰপ্ৰাপ্ত শিক্ষক, বিশিষ্ট ব্যক্তি আদিক লৈ এই সমিতিসমূহ উপায়ুক্তসকলে গঠন কৰি দিব ।
লগতে পঢ়ক: ক'ভিড আতংক আৰু যুৱ প্ৰজন্মৰ কেৰিয়াৰ: কি ক'লে কেৰিয়াৰ মেন্টৰ ৰঞ্জন বৰুৱাই ?
