গুৱাহাটী,৯ নবেম্বৰ : দুৰ্গা পূজাৰ পাছত এইবাৰ ষঠ পূজা আৰু ৰাস মহোৎসৱক কেন্দ্ৰ কৰি মঙলবাৰে ৰাজ্য চৰকাৰে জাৰি কৰে ক'ভিড সম্পৰ্কীয় নতুন নীতি-নিৰ্দেশনা তথা এছ অ’ পি । ৰাজ্য চৰকাৰে জাৰি কৰা এছ অ’ পি অনুসৰি ষঠ পূজা অনুষ্ঠিত হ’বলগীয়া নৈ ঘাট সমূহ চিনাক্ত কৰি চেনিটাইজ কৰাৰ নিৰ্দেশ দিয়া হৈছে ।
এইক্ষেত্ৰত পূজা কমিটিৰ তৰফৰ পৰা স্বেচ্ছাসেৱক নিয়োগ কৰি কি কৰিব লাগিব আৰু কি কৰিব নালাগিব সেই সম্পৰ্কত জনসাধাৰণক অৱগত কৰাৰ বাবেও এছ অ’ পিত উল্লেখ কৰা হৈছে । ষঠ পূজাৰ সময়ত এটা পৰিয়ালৰ পাঁচজন লোকক ঘাটত উপস্থিত থকাৰ অনুমিত দিয়া হৈছে । ঘাটত উপস্থিত থকা লোক সকলে ক’ভিড প্ৰট’কল মানি চলিব লাগিব ।
ষঠ পূজাৰ সময়ত কোনো মেলা বা সাংস্কৃতিক অনুষ্ঠান অনুষ্ঠিত কৰিব নোৱাৰিব । তদুপৰি, পূজা কমিটি সমূহক কোনো অস্থায়ী দোকান পাতিবলৈ অনুমতি নিদিবলৈ নিৰ্দেশ দিয়া হৈছে । পূজাৰ আয়োজক সমিতিৰ লোক সকল এপালি ক’ভিড ভেকচিন গ্ৰহণ কৰা হ’ব লাগিব ।
আনহাতে, ৰাস মহোৎসৱক লৈ দিয়া নিৰ্দেশনা অনুসৰি ৰাস কমিটি সমূহে নিৰ্দিষ্ট জিলা প্ৰশাসনৰ অনুমতি গ্ৰহণ কৰিব লাগিব । জিলা প্ৰশাসনে ৰাস কমিটিক অনুমতি প্ৰদান কৰাৰ পূৰ্বে ৰাজ্য চৰকাৰৰ নিৰ্দেশনাৱলী সমূহ কমিটিৰ লোকক বুজাই দিব লাগিব ।
ৰাজ্য চৰকাৰৰ এছ অ’ পি অনুসৰি ১০ বছৰৰ তলৰ শিশু আৰু ৬৫ বছৰ উৰ্ধৰ লোক সকলক ৰাস মহোৎসৱত উপস্থিত নাথাকিবলৈ কোৱা হৈছে । ৰাস মহোৎসৱ আৰম্ভ হোৱাৰ ৪৮ ঘণ্টা পূৰ্বে ৰাস কমিটিৰ সকলো সদস্য আৰু স্বেচ্ছাসেৱকক ক’ভিড পৰীক্ষা কৰিবলৈ নিৰ্দেশ দিয়া হৈছে । এইক্ষেত্ৰত কোনো স্বেচ্ছাসেৱক ক’ভিড প’জিটিভ হ’লে ৰাস কমিটিয়ে তেওঁলোকক অংশগ্ৰহণ কৰাৰ পৰা বিৰত ৰাখিবলৈ আহ্বান জনোৱা হৈছে ।
ইপিনে ৰাস মহোৎসৱৰ প্ৰৱেশদ্বাৰত দৰ্শনাৰ্থী সকলৰ শৰীৰৰ উষ্ণতা পৰীক্ষা কৰাৰ বাবেও নিৰ্দেশ দিয়া হৈছে । সেইদৰে ৰাস মহোৎসৱৰ আয়োজক সমিতিয়ে সামাজিক দূৰত্ব মানি চলাৰ বাবে আহল-বহল স্থানৰ ব্যাৱস্থা কৰিব লাগিব । প্ৰৱেশ আৰু প্ৰস্থান পথ সম্পূৰ্ণ ৰূপে পৃথক হ'ব লাগিব । স্বেচ্ছাসৱক সকলে মাস্ক পৰিধান কৰাৰ লগতে নিজৰ হাত চেনিটাইজ কৰিব লাগিব । মাস্ক পৰিধান নকৰা কোনো লোকক ৰাস মহোৎসৱ থলীত প্ৰৱেশৰ অনুমতি নিদিবলৈ ৰাস কমিটিক নিৰ্দেশ দিয়া হৈছে ।
লগতে পঢ়ক : মুম্বাইত খহি পৰিল অট্টালিকা : 7 জন আঘাতপ্ৰাপ্ত
