গুৱাহাটী,৬ মাৰ্চ : ২৯ দিন পাছত গুৱাহাটীৰ পাণ্ডু বন্দৰত উপস্থিত হ'ল এম ভি লাল বাহাদুৰ শাস্ত্ৰী (Mv Lal Bahadur Shastri Ship arrives at Pandu port)। ৫ ফেব্ৰুৱাৰীৰ দিনা কেন্দ্ৰীয় বন্দৰ, জাহাজ পৰিবহণ আৰু জলপথ তথা আয়ুষ মন্ত্ৰী সৰ্বানন্দ সোণোৱালে পাটনাৰ পৰা গুৱাহাটীলৈ আহিবলগীয়া জাহাজ এম ভি লাল বাহাদুৰ শাস্ত্ৰীৰ ফ্লেগ অফ কৰিছিল । পাটনাৰ পৰা ২০০ মেট্ৰিক টন খাদ্যশস্য কঢ়িয়াই ৰাওনা হোৱা জাহাজখন দেওবাৰে গুৱাহাটীৰ পাণ্ডু বন্দৰত উপস্থিত হোৱাৰ লগে লগে মুখ্যমন্ত্ৰী হিমন্ত বিশ্ব শৰ্মা (CM Himanta Biswa Sarma at Pandu port ) আৰু কেন্দ্ৰীয় মন্ত্ৰী সোণোৱালে আদৰণি জনায় ।
গংগা নদীৰ পৰা ইণ্ডো-বাংলাদেশ প্ৰট'কল জলপথ হৈ ব্ৰহ্মপুত্ৰ নদীয়েদি এই পৰিবহণে ২,৩৫০ কিলোমিটাৰ জলপথৰ যাত্ৰা সামৰি লয় । ২৯ দিনৰ যাত্ৰাৰ অন্তত মালবাহী জাহাজখনে পাণ্ডু বন্দৰত প্ৰৱেশ কৰে ।
উল্লেখ্য যে ৰাষ্ট্ৰীয় জলপথ (এনডব্লিউ)-১ (গংগা নদী)ৰ পৰা যাত্ৰা আৰম্ভ কৰা জাহাজখনে ভাগলপুৰ, মণিহাৰী, চাহিবগঞ্জ, ফাৰাক্কা, ত্ৰিবেণী, কলকাতা, হলদিয়া, হেমনগৰ, খুলনা, নাৰায়ণগঞ্জ, চিৰাজগঞ্জ, চিলমাৰী হৈ ব্ৰহ্মপুত্ৰয়েদি ধুবুৰী আৰু যোগীঘোপাৰ মাজেৰে চলাচল কৰি পাণ্ডুত প্ৰৱেশ কৰে । অনুষ্ঠানত সাংসদ কুইন ওজাকে ধৰি ভালেসংখ্যক বিশিষ্ট ব্যক্তি আৰু চৰকাৰী বিষয়া উপস্থিত আছিল ।
লগতে পঢ়ক :প্লেণ্টাৰ মেছিনেৰে কৃষিকৰ্ম কৰি পথ প্ৰদৰ্শক হ’ল ৰঙিয়াৰ এগৰাকী মহিলা
