নিউজ ডেস্ক, 16 ডিচেম্বৰ : মুখ্য নিৰ্বাচন আয়ুক্ত আৰু অন্যান্য নিৰ্বাচন আয়ুক্ত বিধেয়ক 2023 ৰ বিৰুদ্ধে থিয় দিছে সাংসদ অজিত কুমাৰ ভূঞা ৷ ৰাজ্যসভাত এই বিষয়ে নিজৰ বক্তব্য দাঙি ধৰি সাংসদ ভূঞাই কয়, "গণতন্ত্ৰ আৰু মৌলিক অধিকাৰ ভাৰতীয় সংবিধানৰ আত্মা আৰু নিৰ্বাচন আয়োগ এনে এক শক্তিশালী আহিলা যিয়ে মানুহৰ মাজত থকা আস্থাক এনেধৰণে ব্যৱহাৰ কৰে, য’ত তেওঁলোকে অনুভৱ কৰে যে মুক্ত আৰু নিকা নিৰ্বাচনী প্ৰক্ৰিয়াত নিৰ্বাচিত প্ৰতিনিধিৰ হাতত তেওঁলোকৰ গণতান্ত্ৰিক অধিকাৰ সুৰক্ষিত হৈ থাকিব ৷"
তেওঁ লগতে কয়, "1991 চনত নিৰ্বাচন আয়োগৰ নিযুক্তিৰ প্ৰক্ৰিয়া আৰু পদ্ধতিত এটা সংশোধন কৰা হৈছিল ৷ যেতিয়া এজন সদস্যৰ আয়োগক তিনিজন সদস্যৰ আয়োগলৈ ৰূপান্তৰিত কৰা হৈছিল যাতে এজন ব্যক্তিৰ একচেটিয়া অধিকাৰ এৰাই চলিব পাৰে ৷ আৰু সেই সংশোধনীক বিজেপিকে ধৰি সকলো ৰাজনৈতিক দলে সমৰ্থন কৰিছিল । কিন্তু এতিয়া সংসদত বিবেচনাৰ বাবে ৰখা সংশোধনীটোৰ কোনো সহমতৰ উপাদান নাই বৰঞ্চ ই হৈছে বুলড’জাৰৰ আইন ।"
তেওঁ লগতে আৰু কয়, "নিৰ্বাচন আয়োগক স্বতন্ত্ৰ বুলি গণ্য আৰু সন্মানিত কৰিব লাগিব, তেতিয়াহে গণতন্ত্ৰ বিকশিত হ’ব । মই দুখৰ সৈতে কওঁ যে যদি চৰকাৰৰ সংখ্যাগৰিষ্ঠ একচেটিয়া অধিকাৰ থাকে, তেন্তে এজন নিৰ্বাচন আয়ুক্তৰ নিৰ্বাচনৰ সৈতে আপোচ কৰা হ’ব । ভাৰতৰ মুখ্য ন্যায়াধীশক বাছনি প্ৰক্ৰিয়াৰ পৰা অপসাৰণ কৰিলে নিশ্চিতভাৱে বিৰোধী লোকসকলৰ মনত এক তীব্ৰ সন্দেহৰ সৃষ্টি হ’ব যে বৰ্তমানৰ চৰকাৰৰ বিদ্বেষমূলক অভিপ্ৰায় আছে ।"
পৰামৰ্শ হিচাপে তেওঁ কয়, "মোৰ আন্তৰিক পৰামৰ্শ হ’ব যদি চৰকাৰক ই চি আই আইন সংশোধনৰ ক্ষেত্ৰত বিবেচনাপূৰ্ণ হিচাপে দেখা যায়, প্ৰধানমন্ত্ৰী আৰু দুটা প্ৰধান বিৰোধী দলৰ নেতাক বাছনি প্ৰক্ৰিয়াৰ সদস্য কৰা উচিত । চৰকাৰৰ পৰা দুজন সদস্য আৰু বিৰোধীৰ তৃতীয়জন সদস্য ই চি আই নিযুক্তি প্ৰক্ৰিয়াৰ ন্যায্য আৰু নিৰপেক্ষ বাছনি সমিতি হ’ব নোৱাৰে । আনকি সাধাৰণ মানুহৰ বুদ্ধিমত্তাত প্ৰস্তাৱিত বিধেয়কখন সংবিধানৰ আত্মাৰ বাবে সংখ্যাগৰিষ্ঠতাৰ বুলেটৰ বাহিৰে আন একো নহয় ।"
ভূঞাই লগতে আৰু উল্লেখ কৰে যে, যিখন বিধেয়ক বিবেচনাৰ বাবে ৰখা হৈছে, সেই বিধেয়কখনে মানুহৰ মাজত আত্মবিশ্বাস সৃষ্টি কৰিব নোৱাৰে কিয়নো ইতিমধ্যে কেইবাটাও ৰাজনৈতিক দল আৰু ব্যক্তিগত সাংবিধানিক বিশেষজ্ঞই ই চি আইৰ পক্ষপাতিত্ব সম্পৰ্কে সন্দেহ প্ৰকাশ কৰিছে । লোকসভাৰ দুজন প্ৰধান বিৰোধী দলৰ নেতা আৰু প্ৰধানমন্ত্ৰীয়ে ই চি আই নিযুক্তিৰ বাবে বাছনি প্ৰক্ৰিয়াৰ পেনেল গঠন নকৰে কিয় ?
সামৰণিত তেওঁ কয়, "কৰো সবকুছ লেকিন এইছে না কৰো কি লোগো কা বিশ্বাস হি টুট যায়ে লোকতন্ত্ৰ ছে ৷ লোকতন্ত্ৰ ৰহেগা তো আওগে জাওগে, লেকিন অগৰ নেহি ৰহেগা লোকতন্ত্ৰ তো কেইছে ফিৰ আওগে ?"
লগতে পঢ়ক : জি পি সিং আৰু আলফা (স্বা) ৰ তৰ্কযুদ্ধ : মুখ খুলিলে মুখ্যমন্ত্ৰী ড৹ হিমন্ত বিশ্ব শৰ্মাই
