নিউজ ডেস্ক, 17 ডিচেম্বৰ : ভাৰত আৰু বাংলাদেশৰ প্ৰধানমন্ত্ৰীৰ দ্বাৰা ভিডিঅ‘ সন্মিলনৰ যোগে বৃহস্পতিবাৰে হলদিবাড়ীৰ পৰা চিলাহাটীলৈ ৰে‘ল সেৱাৰ শুভাৰম্ভ কৰা হয় ৷ ভাৰত আৰু বাংলাদেশৰ নাগৰিকৰ পৰস্পৰৰ মাজত সু-সম্পৰ্ক গঢ়াৰ ক্ষেত্ৰত এই ৰে‘ল সেৱাই সহায় কৰিব বুলি ধাৰণা কৰা হৈছে ৷
ভাৰতৰ প্ৰধানমন্ত্ৰী নৰেন্দ্ৰ মোদী আৰু বাংলাদেশৰ প্ৰধানমন্ত্ৰী শ্বেখ হাছিনাৰ মাজত প্ৰধানমন্ত্ৰী পৰ্যায়ত হোৱা দ্বিপাক্ষিক ভিডিঅ‘ সন্মিলনত ভাৰতৰ হলদিবাড়ীৰ পৰা বাংলাদেশৰ চিলাহাটীলৈ ৰে‘লৰ যোগাযোগ ব্যৱস্থাৰ শুভাৰম্ভ কৰা হয় ৷
বাংলাদেশৰ ৰে‘ল মন্ত্ৰী মহম্মদ নুৰুল ইছলাম সূজন দেৱে চিলাহাটীৰ পৰা এখন মালবাহী ৰেলৰ যাত্ৰা শুভাৰম্ভ কৰে ৷ যিখন ৰেলে ভাৰত-বাংলাদেশ আন্তৰ্জাতিক সীমান্ত পাৰ হৈ ভাৰতত প্ৰবেশ কৰে ৷ ইয়াৰ লগে লগে দুয়োখন দেশৰ ৰাইজৰ বাবে নতুন অধ্যায়ৰ সূচনা হয় ৷
উল্লেখ্য যে, ভাৰত আৰু বাংলাদেশৰ ৰে‘লৱে সেৱা ঘাইকৈ ইংৰাজ শাসনকালৰ পৰাই উত্তৰাধিকাৰী সুত্ৰে দুয়োখন দেশে লাভ কৰিছিল ৷ 1947 চনত দেশ বিভাজনৰ পিছত 7 টা ৰেল যোগাযোগ সেই সময়ৰ ভাৰতবৰ্ষ আৰু পূৱ পাকিস্তানৰ মাজত সক্ৰিয় হৈ আছিল(1965 পৰ্যন্ত ) ৷ বৰ্তমানে ভাৰত আৰু বাংলাদেশৰ মাজত 4 টা ৰে‘ল যোগাযোগ কাৰ্যক্ষম হৈ আছে ৷ আজি শুভাৰম্ভ হোৱা ৰে’ল সংযোগে দুয়োখন দেশৰ মাজত পঞ্চমটো কাৰ্যক্ষম ৰে‘ল যোগাযোগ হিচাপে পৰিগণিত হৈছে ৷
লগতে পঢ়ক: উত্তৰ পূৰ্বাঞ্চলৰ মহিলাক ভাৰতীয় সেনাবাহিনীত দ্বিতীয় পৰ্যায়ৰ অন্তৰ্ভুক্তি
