গুৱাহাটী, ৩১ আগষ্ট: পৱিত্ৰ গণেশ চতুৰ্থীৰ দিনা মহানগৰীৰ নাৰেংগীস্থিত চেন্ট্ৰেল ড্ৰাগ বেৱাৰ হাউচ(Central Drug weber house Guwahati) কেম্পাচত চিকিৎসা সেৱা নিগমৰ এটা কাৰ্যালয় গৃহ মুকলি কৰা হয় । এই উপলক্ষে আয়োজিত এক অনুষ্ঠানত অত্যাধুনিক সা-সুবিধাসম্পন্ন কাৰ্যালয় গৃহটো আনুষ্ঠানিকভাৱে মুকলি কৰে স্বাস্থ্যমন্ত্ৰী কেশৱ মহন্তই(Health minister Keshab Mahanta) ।
কাৰ্যালয় মুকলি কৰি ভাষণ প্ৰসংগত স্বাস্থ্য মন্ত্ৰীগৰাকীয়ে কয় যে, ২০১৬ চনত তেতিয়াৰ স্বাস্থ্যমন্ত্ৰী তথা বৰ্তমানৰ মুখ্যমন্ত্ৰী হিমন্ত বিশ্ব শৰ্মাৰ সুচিন্তাৰ ফচল অসম চিকিৎসাসেৱা নিগম আৰম্ভ হৈছিল । এতিয়াৰে পৰা এই নিগমটোক অধিক দায়িত্ব আৰু ক্ষমতা অৰ্পণ কৰাৰ বাবে স্বাস্থ্য বিভাগে তৎপৰতা গ্ৰহণ কৰিছে । স্বাস্থ্য বিভাগত সকলো দৰৱ-পাতিকে ধৰি সকলো ক্ৰয় প্ৰক্ৰিয়া এই নিগমৰ জৰিয়তে হ’ব ।
তাৰোপৰি এই নিগমৰ জৰিয়তে ৰাইজে যাতে নিয়মীয়াভাৱে হাস্পতালত ঔষধ পায় তাৰ ব্যৱস্থা কৰিছে স্বাস্থ্য বিভাগে । এই নিগমক স্বতন্ত্ৰভাৱে পৰিচালনাৰ বাবে দায়িত্ব অৰ্পন কৰা হৈছে । সেই অনুসৰি এই নিগমৰ অধ্যক্ষ হিচাবে থাকিব আই এ এছ বিষয়া অবিনাশ যোশী (IAS officers Avinash Joshi)। তাৰোপৰি পৰিচালন সঞ্চালক হিচাবে থাকিব ভাৰতবৰ্ষৰ প্ৰখ্যাত চিকিৎসক ডাঃ ৰবীন কুমাৰ ।
ইতিমধ্যে নিগমৰ বাবে প্ৰয়োজনীয় বিষয়া-কৰ্মচাৰীৰ বাবে ব্যৱস্থা গ্ৰহণ কৰা হৈছে । আনহাতে চলিত বছৰৰ পৰাই অসমৰ ৰাইজে সময়মতে সকলো ঔষধ-পাতি পোৱাৰ সা- সুবিধা উপলব্ধ হ’ব বুলি জানিবলৈ দি মন্ত্ৰীগৰাকীয়ে কয়, এই নিগমৰ অধীনত নিজা ফাৰ্মাচী থাকিব । বজাৰতকৈ কম মূল্যত যাতে ঔষধ পায় তাৰ বাবে ইতিমধ্যে চিন্তা চৰ্চা কৰা হৈছে বুলি জানিবলৈ দিয়ে স্বাস্থ্যমন্ত্ৰীগৰাকীয়ে ।
লগতে পঢ়ক: দিব্যাংগসকলৰ সাংবিধানিক সংৰক্ষণ ব্যৱস্থাৰ নিশ্চিতি প্ৰদান পীযুষ হাজৰিকাৰ
