গুৱাহাটী, ১০ জুন: বৃহস্পতিবাৰে হোৱা মন্ত্ৰীসভাৰ সাল-সলনিৰ পাছতে গুৱাহাটী উন্নয়ন বিভাগটোক লৈ সৃষ্টি হোৱা প্ৰশ্ন সন্দৰ্ভত স্পষ্টীকৰণ দিছে জনসংযোগ বিভাগে । সেই অনুসৰি মন্ত্ৰী অশোক সিংহলৰ হাততেই আছে গুৱাহাটী উন্নয়ন বিভাগ (Minister Ashok Singhal still is in charge of GDD) । মন্ত্ৰীগৰাকীৰ পৰা গুৱাহাটী উন্নয়ন বিভাগৰ দায়িত্ব কৰ্তন কৰা বুলি চলা প্ৰচাৰ শুদ্ধ নহয় বুলি এক বিবৃতিৰ জৰিয়তে জনসংযোগ বিভাগে স্পষ্ট কৰি দিছে ।
বিবৃতিটোত কোৱা হৈছে যে অসম চৰকাৰৰ গুৱাহাটী উন্নয়ন বিভাগ আৰু নগৰ উন্নয়ন বিভাগৰ চামিলকৰণেৰে পূৰ্বেই গৃহ আৰু নগৰ পৰিক্ৰমা বিভাগ গঠন কৰা হৈছে । এই পদক্ষেপৰ জৰিয়তে গুৱাহাটীৰ উন্নয়নৰ দায়িত্বও গৃহ আৰু নগৰ পৰিক্ৰমা বিভাগৰ ওপৰতে অৰ্পণ কৰা হৈছে । পূৰ্বৰে পৰা এই বিভাগৰ দায়িত্বত আছে মন্ত্ৰী অশোক সিংহল । সেয়ে সামগ্ৰিকভাৱে সমগ্ৰ নগৰ পৰিক্ৰমা বিভাগৰ লগতে গুৱাহাটীৰ উন্নয়নৰ দায়িত্বও মন্ত্ৰী অশোক সিংহলৰ ওপৰতে ন্যস্ত হৈ আছে । এইক্ষেত্ৰত মন্ত্ৰী অশোক সিংহলক গুৱাহাটী উন্নয়ন বিভাগৰ দায়িত্বৰ পৰা আঁতৰাই দিয়া বুলি প্ৰচাৰিত বাতৰি ভুল আৰু বিভ্ৰান্তিকৰ বুলি সদৰি কৰিছে জনসংযোগ বিভাগে ।
লগতে পঢ়ক: পৌৰসভাৰ কাণ্ডজ্ঞানহীনতা: ডাম্পিং গ্ৰাউণ্ডলৈ পৰিণত ৰাজহুৱা খেলপথাৰ
