গুৱহাটী, ১৫ জুন : মঙলবাৰে ৰাজ্যজুৰি পালন কৰা হয় শ্বহীদ কুশল কোঁৱৰৰ ৭৮ সংখ্যক মৃত্যু দিৱস ৷ সমান্তৰালভাৱে গুৱাহাটীত পানবজাৰৰ নেহৰু উদ্যানত সম্পূৰ্ণ ক'ভিড প্ৰট’কল মানি পালন কৰা হয় শ্বহীদ কুশল কোঁৱৰৰ মৃত্যু দিৱস ৷ অসম ৰাজ্যিক মুক্তি যুঁজাৰু সন্মিলন আৰু কামৰূপ মহানগৰ জিলা প্ৰশাসনৰ যুটীয়া উদ্যোগত আয়োজন কৰা অনুষ্ঠানটোত উদ্যোগ আৰু বাণিজ্য মন্ত্ৰী চন্দ্ৰমোহন পাটোৱাৰীয়ে মুখ্য অতিথি হিচাপে অংশ গ্ৰহণ কৰে ।
মন্ত্ৰীগৰাকীয়ে শ্বহীদ কুশল কোঁৱৰৰ প্ৰতিমূৰ্তিত মাল্যাৰ্পনেৰে শ্ৰদ্ধাঞ্জলি নিবেদন কৰি কয় যে দেশবাসীৰ অন্তৰত দেশপ্ৰেম আৰু ভাতৃত্ববোধৰ উদ্ৰেক হ'লেহে শ্বহীদৰ প্ৰতি প্ৰকৃত শ্ৰদ্ধাঞ্জলি জ্ঞাপন কৰা হ'ব । অনুষ্ঠানত শ্বহীদ কুশল কোঁৱৰৰ সৰু বোৱাৰী যমুনা কোঁৱৰে অংশ গ্ৰহণ কৰে ।
জিলা উপায়ুক্ত বিশ্বজিৎ পেগুকে ধৰি প্ৰশাসনৰ কেইবাজনো বিষয়া আৰু অসম ৰাজ্যিক মুক্তি যুঁজাৰু সন্মিলনৰ কেইবাগৰাকী বিষয়ববীয়া উপস্থিত থাকি শ্বহীদ কুশল কোঁৱৰৰ প্ৰতি শ্ৰদ্ধা নিবেদন কৰে । উল্লেখ যে, অনুষ্ঠানত অসম ৰাজ্যিক মুক্তি যুঁজাৰু সন্মিলনৰ তৰফৰ পৰা মন্ত্ৰীগৰাকীক এখন স্মাৰক পত্ৰ মুখ্যমন্ত্ৰীৰ প্ৰতি প্ৰদান কৰা হয় ।
