গুৱাহাটী, 4 জুলাই : সম্প্ৰতি দুসপ্তাহৰ লক ডাউনৰ মাজত গুৱাহাটী মহানগৰীকে ধৰি সমগ্ৰ কামৰূপ (ম) জিলাৰ জনতাই নিজকে গৃহবন্দী কৰি ৰাখিছে যদিও আগন্তুক সোমবাৰ আৰু বুধবাৰে লকডাউন আংশিকভাৱে শিথিল কৰাৰ সিদ্ধান্ত লৈছে ৰাজ্য চৰকাৰে ৷
সেইমৰ্মে, শনিবাৰে মুখ্য সচিব কুমাৰ সঞ্জয় কৃষ্ণই জাৰি কৰিছে এলানি নতুন নিৰ্দেশনা । এই নিৰ্দেশনা অনুসৰি, 6 আৰু 8 জুলাইত দুদিনৰ বাবে কামৰূপ (ম) জিলাৰ 20 শতাংশ গেলামালৰ দোকান দিনৰ 11 বজাৰ পৰা নিশা 8 বজালৈ খোলা থাকিব ৷ সেই সময়ছোৱাত ক্ৰেতা-বিক্ৰেতা সকলোৱে মাস্ক পৰিধান কৰাৰ লগতে চৰকাৰে জাৰি কৰা সকলো স্বাস্থ্য বিধি মানি চলিব লাগিব ।
এই দুদিনৰ সময়ছোৱাত পুৱা 8 বজাৰ পৰা দিনৰ 2 বজালৈ ঘৰে ঘৰে গৈ বিক্ৰেতাসকলে পাচলি আৰু ফল-মূল বিক্ৰী কৰিব পাৰিব যদিও ফুটপাথৰ দোকানসমূহ পূৰ্বৰ দৰেই বন্ধ থাকিব । 10 জুলাইত দিনৰ 11 বজাৰ পৰা 8 বজালৈ ই-কমাৰ্চ খোলা থাকিব ৷
আনহাতে, পশুখাদ্যৰ দোকানসমূহ 6 আৰু 8 জুলাইত পুৱা 10 বজাৰ পৰা 8 বজালৈ খোলা ৰাখিব পাৰিব । দৰৱৰ পাইকাৰী দোকানসমূহ এই দুদিনত পুৱা 8 বজাৰ পৰা দিনৰ 2 বজালৈ খোলাৰ অনুমতি দিয়ে প্ৰশাসনে ।
লগতে পঢ়ক : ৩০ নৱেম্বৰলৈ বৃদ্ধি আয়কৰ জমা দিয়াৰ সময়সীমা
