গুৱাহাটী, ৫ এপ্ৰিল: ‘‘ইতিহাস নাইকীয়া কৰিব বিচাৰিলে ভুল পদক্ষেপ হ'ব । পুৰণিখিনি অধ্যয়ন কৰিলে বহুত নতুন বস্তু শিকিব পাৰি । ইতিহাস নতুনকৈ ৰচিব নোৱাৰি ।’’ এই মন্তব্য বিৰোধী দলপতি দেৱব্ৰত শইকীয়াৰ । 'মোগল' বিতৰ্ক সন্দৰ্ভত প্ৰতিক্ৰিয়া প্ৰকাশ কৰি বুধবাৰে বিধানসভা চৌহদত সংবাদ মাধ্যমৰ আগত তেওঁ কয় যে, মোগলৰ স্থাপত্যৰ প্ৰভাৱ অসমৰ কৃতীচিহ্ন সমূহত আছে (Debabrat Saikia reacts on Mughal controversy) ।
তেনেস্থলত ইতিহাস নাইকিয়া কৰিব বিচাৰিলে অতি ভুল পদক্ষেপ হ'ব । ইতিহাস অধ্যয়ন কৰাটো দৰকাৰ বুলি উল্লেখ কৰি তেওঁ কয় যে, চৰকাৰৰ এনে পদক্ষেপে হিতে বিপৰীত কৰিব । কি কাৰণে চৰকাৰে এনে কৰিব বিচাৰিছে ধৰিব পৰা নাই । ইতিহাস জনাটো অতি প্ৰয়োজনীয় আৰু সকলোখিনি থকাটো দৰকাৰ (Mughal History controversy) । তেওঁ লগতে কয় যে, মোগলৰ বিৰুদ্ধে লাচিত বৰফুকনে বীৰত্বৰে যুঁজ দিয়াৰ বিষয়ে বিশ্ববাসীক জনোৱাৰ বাবেই অসম চৰকাৰে ৪০০ কোটি টকা খৰচ কৰিলে ।
বিজেপি চৰকাৰে তেওঁলোকৰ হজম নোহোৱা কিছুমান ইতিহাস পাঠ্যপুথিৰ পৰা আঁতৰাব বিচাৰিছে (Exclusion of mughal empire from NCERT syllabus) । কিন্তু ইতিহাস নতুনকৈ ৰচনা কৰিব নোৱাৰি । ইতিহাস সদায় ইতিহাস হৈ থাকিব দিব লাগে । মোগল বুৰঞ্জী আঁতৰাব বিচাৰিলেই ভাৰতৰ বাহিৰৰ মানুহে পঢ়িবই । চৰকাৰে বিচৰা ধৰণে নিৰ্দ্দিষ্ট কিছু অধ্যায় অধ্যয়ন কৰিলে অজ্ঞ হৈ থাকিব লাগিব । তাজমহল আৰু কুতুবমিনাৰ ভাঙি মন্দিৰ নিৰ্মাণ কৰিব লাগে বুলি বিধায়ক ৰূপজ্যোতি কুৰ্মীয়ে কৰা মন্তব্যক তেওঁ দুখজনক আখ্যা দিয়ে ।
তেওঁ কয় যে, এনেদৰে কোৱাৰ আঁৰত সামাজিকৰ লগতে ৰাজনৈতিক কাৰণ আছে (Exclusion of mughal empire controversy) । বিজেপি চৰকাৰে দেশৰ ইতিহাস নষ্ট কৰাৰ পৰিকল্পিত ষড়যন্ত্র কৰা বুলি তেওঁ অভিযোগ কৰে ।
লগতে পঢ়ক: Financial scam in Majuli: ঋণৰ নামত পতি-পত্নীয়ে মিলি লুটিলে গ্ৰাহকক
