গুৱাহাটী, ২২ জুন: বাৰিষা আৰম্ভ হোৱাৰ লগে লগেই মহানগৰীৰ বিভিন্ন স্থানত ভূমিস্খলন হৈ বিস্তৰ ক্ষতিসাধন হোৱাটো নতুন কথা নহয় । চলিত বাৰিষাতো মহানগৰীৰ কেইবাটাও স্থানত ভূমিস্খলনৰ ঘটনা সংঘটিত হৈছে । এক কথাত ক'বলৈ গ'লে বাৰিষাৰ লগে লগে গুৱাহাটী মহানগৰীৰ একাংশ বাসিন্দাৰ নিদ্ৰাহৰণ হয় । লক্ষণীয় বিষয় যে সৰু -বৰ ১৮ খন পাহাৰেৰে আগুৰি থকা গুৱাহাটী মহানগৰীৰ গৰিষ্ঠ সংখ্যক পাহাৰেই জনবসতিপূৰ্ণ । বছৰৰ পাছত বছৰ ধৰি গুৱাহাটীৰ পাহাৰসমূহত চলা অবৈধ খনন কাৰ্য আৰু অপৰিকল্পিত নিৰ্মাণ কাৰ্যৰ ফলত পাহাৰসমূহৰ ব্যাপক অবক্ষয় হৈছে । যাৰ বাবেই এজাক বৰষুণ দিলেই পাহাৰসমূহে পানী বহন কৰিব নোৱাৰে । ফলত বৰষুণৰ পানীৰ সৈতে তললৈ নামি আহে পাহাৰৰ বোকা আৰু শিলাময় মাটি ।
গুৱাহাটীৰ ভয়াৱহ কৃত্রিম বানৰো অন্যতম এটা কাৰণ পাহাৰৰ অবক্ষয় । এজাক বৰষুণতে পাহাৰৰ মাটিৰে নলা-নৰ্দমাসমূহ পৰিপূৰ্ণ হৈ পৰে । পাহাৰসমূহৰ সংৰক্ষণৰ অভাৱতে প্ৰাকৃতিকভাৱে চহকী গুৱাহাটী মহানগৰীয়ে বৰ্তমান কৃত্রিম বানপানী আৰু ভূমিস্খলনৰ জটিল সমস্যাৰে যুঁজ দিবলগীয়া হৈছে । উল্লেখ্য যে কামৰূপ মহানগৰ জিলা প্ৰশাসনে গুৱাহাটী মহানগৰীৰ ৩৯২টা এলেকা ভূমিস্খলনপ্ৰৱণ এলেকা হিচাপে চিহ্নিত কৰিছে । ভূমিস্খলন হ'ব পৰা বিপদজ্জনক পাহাৰীয়া এলেকাসমূহ হৈছে ফটাশিল, ভঙাগড়, গোটানগৰ, হেঙেৰাবাৰী, জালুকবাৰী, লংকেশ্বৰ, কাহিলীপাৰা, কালাপাহাৰ, খাৰঘূলি, কইনাধৰা, মালিগাঁও, নৱগ্রহ, নৰকাসুৰ, নাৰেংগী, নুনমাটি আদি ।
ইয়াৰ ভিতৰত চূণশালিৰ ৭৭টাকৈ স্থান, খাৰঘূলিৰ ৩৭ টা স্থান, শৰণীয়াৰ ৫টা স্থান, শান্তিপুৰৰ ২০টা স্থান বিপদজনক, নাৰেংগীৰ ৩১ টা স্থান, নুনমাটিৰ ৪০ টা স্থান, নৰকাসুৰৰ ১৪ টা স্থান, নৱগ্ৰহৰ ৬ টা স্থান, মালিগাঁৱৰ ৮ টা স্থান, কইনাধৰাৰ ৫ টা স্থান, খানাপাৰাৰ ৩৩ টা স্থান, কামাখ্যাৰ ৫ টা স্থান, কালাপাহাৰৰ ৭ টা স্থান, কাহিলীপাৰাৰ ২৫ টা স্থান, জালুকবাৰীৰ ২টা স্থান, হেঙেৰাবাৰীৰ ৩০ টা স্থান, গোটানগৰৰ ৬ টা স্থান, গড়ভঙাৰ ৯ টা স্থান, ফটাশিলত ৫ টা স্থান স্পৰ্শকাতৰ বুলি চিনাক্ত কৰা হৈছে । শেহতীয়াকৈ মুখ্যমন্ত্রী ড৹ হিমন্ত বিশ্ব শৰ্মাই ভিডিঅ' কনফাৰেঞ্চ যোগে জিলা আয়ুক্ত সকলৰে সাম্ভাৱ্য বান পৰিস্থিতিৰে মোকাবিলা কৰিবলৈ লোৱা প্ৰস্তুতি সন্দৰ্ভত বিশদভাৱে কৰা আলোচনাতো গুৱাহাটীৰ ভূমিস্খলনৰ প্ৰসংগ উত্থাপন হৈছিল ।
গুৱাহাটীৰ ভূমিস্খলনৰ প্ৰসংগত জিলা আয়ুক্ত পল্লৱ গোপাল ঝাই মুখ্যমন্ত্রীক অৱগত কৰিছিল যে বিগত বৰ্ষত গুৱাহাটীত ৮৭ টা ভূমিস্খলন হৈছিল । বিগত বৰ্ষত ভূমিস্খলনৰ বাবে ৪টা আশ্ৰয় শিবিৰ স্থাপন কৰা হৈছিল । আনহাতে, গুৱাহাটীত ৩৯২ টা ভূমিস্খলনপ্ৰৱণ এলেকা থকাৰ কথাও সদৰি কৰিছিল । এই বিপদ সংকুল এলেকাসমূহত বসবাস কৰা লোকসকল দৰিদ্ৰ আৰু যাৰ বাবে তেওঁলোকে সেই ঠাই এৰি যাব নিবিচাৰে । লক্ষণীয় বিষয় যে পাহাৰৰ এই স্পৰ্শকাতৰ অঞ্চলৰ বিষয়টো কোনটো বিভাগৰ অধীনত পৰে সেয়া নিশ্চিত নহয় । আনকি এই কথা উপায়ুক্ত ঝাই মুখ্যমন্ত্রীক অৱগত কৰিছিল । এক কথাত ক'বলৈ গ'লে বিপদজনক পৰিস্থিতিত বসবাস কৰা এই লোকসকলৰ ভৱিষ্যত কি হ'ব তাক লৈ কোনো এটা চৰকাৰী বিভাগৰ কোনো দায়িত্ব নাই ।
গুৱাহাটীৰ পাহাৰীয়া অঞ্চলৰ এই জটিল সমস্যা সন্দৰ্ভত ই টি ভি ভাৰতৰ তৰফৰ পৰা ভূমি অধিকাৰ সংগ্ৰাম সমিতিৰ সভাপতি প্ৰবীণজ্যোতি কলিতাৰ সাক্ষাৎকাৰ গ্ৰহণ কৰা হৈছিল । সাক্ষাৎকাৰত তেওঁ কয় যে বাৰিষা আহিলে চৰকাৰ তথা প্ৰশাসনৰ পাহাৰত বিপদ সংকুল অৱস্থাত বসবাস কৰা লোকসকলৰ কথা মনত পৰে । আজিৰ এই পৰিস্থিতি এদিনতে হোৱা নাই । চৰকাৰৰ অবহেলাৰ বাবেই আজিৰ এই পৰিস্থিতিৰ উদ্ভৱ হৈছে । গুৱাহাটীৰ ১৮ খন পাহাৰৰ ভিতৰত ১৫ খনতে ভূমিস্খলনপ্ৰৱণ এলেকা আছে । নিয়মমাফিক প্ৰশাসনে পাহাৰৰ মাটি কটাত নিষেধাজ্ঞা আৰোপ কৰে যদিও কাৰ্যতঃ এয়া ৰোধ হোৱা নাই । বৰং চৰকাৰেই পাহাৰৰ মাটি কাটি আছে বুলি তেওঁ অভিযোগ কৰে । তেওঁ লগতে কয় যে গুৱাহাটীৰ পাহাৰ অঞ্চলত ৭০ হাজাৰৰো অধিক পৰিয়ালে বাস কৰে । ইফালে, চৰকাৰেই সমস্যাসমূহ জীয়াই ৰাখি ৰাজনীতি কৰি আহিছে বুলি তেওঁ অভিযোগ কৰে ।
লগতে পঢ়ক:AJYCP Protest in Morigaon: মণিপুৰ চৰকাৰ ভংগ কৰি ৰাষ্ট্ৰপতি শাসনৰ দাবী AJYCP ৰ
