গুৱাহাটী, ২৭ আগষ্ট : এইবাৰ হেকাৰৰ কৱলত পৰিছে অসম ৰাজ্যিক বিজেপিৰ মুখপাত্ৰ, অসম ক্ৰীড়া প্ৰাধিকৰণৰ উপ সভাপতি লক্ষ্য কোঁৱৰ ৷ হেক হৈছে অসম অলিম্পিক সন্থাৰ সাধাৰণ সম্পাদক লক্ষ্য কোঁৱৰৰ ফেচবুক একাউন্ট (Lakhya Konwar's Facebook account hacked) । কোনো দুষ্ট চক্ৰই লক্ষ্য কোঁৱৰৰ ফেচবুক একাউন্ট হেক কৰি চলাইছিল অপপ্ৰচাৰ ।
আনকি দুষ্ট চক্ৰটোৱে লক্ষ্য কোঁৱৰৰ ফেচবুক একাউন্ট হেক কৰি ৰাজনৈতিক আৰু অন্যান্য ৰাজহুৱা পদৰ পৰা অব্যাহতি লোৱা বুলি ফেচবুক একাউন্টৰ জৰিয়তে অপপ্ৰচাৰ চলাইছিল । অৱশ্যে দুষ্ট চক্ৰটোৱে লক্ষ্য কোঁৱৰৰ ফেচবুক একাউন্টৰ পৰা প’ষ্টটো দিয়াৰ কিছু সময় পিছতে উক্ত প’ষ্টটো ডিলিট কৰি দিয়ে । এই কথা জানিবলৈ দিয়ে অসম অলিম্পিক সন্থাৰ সাধাৰণ সম্পাদক লক্ষ্য কোঁৱৰে ৷
উক্ত ঘটনা পোহৰলৈ অহাৰ পিছতে লক্ষ্য কোঁৱৰে শনিবাৰে দিছপুৰ আৰক্ষী থানাত দাখিল কৰে এক এজাহাৰ ।
উল্লেখ্য যে, এইবাৰ দুষ্ট চক্ৰৰ লক্ষ্য হৈ পৰিছে ৰাজ্যৰ বিশিষ্ট ব্যক্তিসকল । দুষ্ট চক্ৰই মন্ত্ৰী বিমল বৰা, কামৰূপ মহানগৰ জিলাৰ উপায়ুক্ত পল্লৱ গোপাল ঝাৰ ফটো ব্যৱহাৰ কৰি হোৱাটআপ যোগে ধন দাবীও কৰিছিল ৷ লগতে মহানগৰ আৰক্ষী আয়ুক্ত হৰমিত সিংঙৰ ফটো ব্যৱহাৰ কৰি হোৱাটআপ একাউন্ট খোলাৰ ঘটনাও পোহৰলৈ আহিছিল ৷
এই ঘটনাৰ উত্তেজনা মাৰ নৌযাওতে পুনৰ বিজেপিৰ যুৱ নেতাগৰাকীৰ ফেচবুক একাউন্ট হেক কৰি অপপ্ৰচাৰ চলোৱাত ৰাজ্যজুৰি প্ৰতিক্ৰিয়াৰ সৃষ্টি হৈছে ।
লগতে পঢ়ক : দেওবাৰৰ পৰীক্ষাত সাংবাদিকক হুলস্থূল নকৰিবলৈ ক’লে ডিজিপিয়ে
