কৃষক মুক্তিৰ জোঁৰ সমদলে কঁপালে ৰাজ্যৰ আকাশ বতাহ

ৰাজ্যজুৰি কেবৰ বিৰুদ্ধে কৃষক মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতিৰ জোঁৰ সমদল ৷ আকোঁৰগোজ স্থিতিৰে কেন্দ্ৰই কেব গৃহীত কৰিলে অসমীয়া ৰাইজে অনাগত সময়ত বিজেপিক দিব উচিত প্ৰত্যুত্তৰ ৷ দিল্লীৰ ওচৰত আত্মসমপৰ্ণ একালত বিদেশীৰ বিৰুদ্ধে তীব্ৰ আন্দোলন কৰা আঞ্চলিক দল অগপৰ ৷

নিউজ ডেস্ক, 03 ডিচেম্বৰঃ নাগৰিকত্ব সংশোধনী বিধেয়ক সন্দৰ্ভত অসম গণ পৰিষদৰ ভূমিকাক তীব্ৰ সমালোচনা ৰাজ্যৰ জনসাধাৰণৰ ৷ দিল্লীৰ ওচৰত আত্মসমপৰ্ণ একালত বিদেশীৰ বিৰুদ্ধে তীব্ৰ আন্দোলন কৰা আঞ্চলিক দলটোৰ ৷ অসমৰ ৰাইজে নিবিচাৰিলেও অগপৰ নেতৃত্বই বিনাদ্বিধাই বিচাৰে নাগৰিকত্ব সংশোধনী বিধেয়ক ৷ গৃহমন্ত্ৰী অমিত শ্বাহৰ সৈতে হোৱা বৈঠকত অসম চুক্তিৰ ছয় নং দফা কাৰ্যকৰী কৰাৰ প্ৰতিশ্ৰুতিত ভোল গ'ল অগপৰ নেতৃত্ব ৷ পৰিণতিত কেবৰ সমান্তৰালভাৱে এতিয়া অসমৰ একমাত্ৰ আঞ্চলিক দল অগপৰ বিৰুদ্ধে ৰাজপথলৈ ওলাই আহিছে ৰাজ্যৰ জনতা ৷

মঙলবাৰে কৃষক মুক্তি সংগ্ৰাম সমিতি আৰু ছাত্ৰ মুক্তি সংগ্ৰাম সমিতিয়ে কেব বাতিলৰ দাবীৰে ৰাজ্যজুৰি ৰূপায়ন কৰে জোঁৰ সমদলৰ কাৰ্যসূচী ৷ গুৱাহাটীত কৃষক মুক্তিৰ জোঁৰ সমদল কাৰ্যসূচীত অখিল গগৈৰ লগতে অংশগ্ৰহণ ৰাজ্যৰ বুদ্ধিজীৱি সমাজৰ ৷ সকলোৰে মাত্ৰ এটাই দাবী, কোনো কাৰণতে অসমীয়া জাতি মাটি ভেঁটিক বিদেশীৰ ওচৰত বন্ধকত থবলৈ দিয়া নহ'ব ৷ আনহাতে কেব গৃহীত হ'লে অসমতে সংখ্যালঘুত পৰিণত হ'ব অসমীয়া ৷ অসমীয়াৰ নাথাকিব ৰাজনৈতিক, অৰ্থনৈতিক আৰু ভাষিক অধিকাৰ ৷ কিন্তু কেৱল গাদী ৰক্ষাৰ স্বাৰ্থতে বিনাচৰ্তে অগপই নাগৰিকত্ব সংশোধনী বিধেয়ক মানি লৈছে বুলি অভিযোগ কৃষক নেতা অখিল গগৈৰ ৷

একেদৰে মৰাণ, গোলাঘাট, চিৰাং, নগাঁও আৰু বিলাসীপাৰাতো সংগঠটোৱে জোঁৰ সমদলৰ জৰিয়তে কেবৰ বিৰুদ্ধে সাব্যস্ত কৰে তীব্ৰ প্ৰতিবাদ ৷ সংগঠনটোৰ স্পষ্ট মত, কেন্দ্ৰীয় বিজেপি চৰকাৰে আৰু মুখ্যমন্ত্ৰী সৰ্বানন্দ সোণোৱালে সন্মান কৰক অসমীয়া জনসাধাৰণৰ মতামতক ৷ ইমানৰ পাছতো বিজেপি চৰকাৰে আকোঁৰগোজ স্থিতিৰে কেব গৃহীত কৰিলে নিশ্চিতভাৱে অনাগত সময়ত পাব ইয়াৰ উচিত প্ৰত্যুত্তৰ ৷

লগতে পঢ়ক, কেবৰ বিৰুদ্ধে ৰাজপথত জনতা , আকোঁৰগোজ চৰকাৰ