গুৱাহাটী, ২২ ছেপ্টেম্বৰ : কৰ'ণাসৃষ্ট পৰিস্থিতিৰ মাজতে মঙলবাৰে সমগ্ৰ দেশ তথা বিশ্বত পালন কৰা হ'ল আন্তৰ্জাতিক শান্তি দিৱস । প্ৰতি বছৰে ২১ ছেপ্টেম্বৰৰ দিনটো আন্তৰ্জাতিক শান্তি দিৱস হিচাপে পালন কৰা হয় । আন্তৰ্জাতিক শান্তি দিৱসৰ লগত সংগতি ৰাখি ৰাজ্যৰ ভিন্ন প্ৰান্তত বিভিন্ন কাৰ্যসূচী ৰূপায়ণ কৰা হৈছে ।
মহানগৰীৰ অসম ডাউন টাউন বিশ্ববিদ্যালয়ত আন্তৰ্জাতিক শান্তি দিৱস উপলক্ষে গছপুলি ৰোপণ কাৰ্যসূচী ৰূপায়ণ কৰা হয় ৷ বিশ্ববিদ্যালয় চৌহদত ১০ ডাল ৰুদ্ৰাক্ষৰ, ৫০ ডাল ৰঙা চন্দন আৰু ৫০ ডাল বগা চন্দনৰ পুলি ৰোপণ কৰে বিশ্ববিদ্যালয় কৰ্তৃপক্ষই । এই কাৰ্যসূচীৰ জৰিয়তে বিশ্ববিদ্যালয় কৰ্তৃপক্ষই ছাত্ৰ-ছাত্ৰীসকলক পাঠ্যপুথিৰ সমান্তৰালকৈ পৰিৱেশ সংৰক্ষণৰ ক্ষেত্ৰতো সজাগ হোৱাৰ ওপৰতো গুৰুত্ব প্ৰদান কৰিবলৈ আহ্বান জনায় ।
এই গছপুলি ৰোপণ কাৰ্যসূচীত উপস্থিত থাকে বিশ্ববিদ্যালয়খনৰ উপাচাৰ্য নাৰায়ণ চন্দ্ৰ তালুকদাৰ, ডিন অৱ ষ্টাডিজ প্ৰফেচৰ বন্দনা দত্ত, ৰিচাৰ্চ এডভাইজাৰ ধৰ্মেশ্বৰ দাস আদিকে ধৰি কেইবাগৰাকীও বিশিষ্ট ব্যক্তি ।
ইফালে আন্তৰ্জাতিক শান্তি দিৱসৰ লাইভ মেডিটেশ্বন কাৰ্যসূচীত অংশগ্ৰহণ কৰে হাৰ্টফুলনেছৰ গ্লৱেল শিক্ষক ডাজী, পিচ ওৱান ডেৰ উদ্ভাৱক জেৰেমী গিল, বেডমিণ্টন খেলুৱৈ পি ভি সিন্ধু আৰু বহুকেইগৰাকী গণ্য মান্য ব্যক্তি । এই কাৰ্যসূচীৰ লগত সংগতি ৰাখি ছাত্ৰ-ছাত্ৰীৰ মাজত ''সহানুভূতিশীল কাৰ্য'' শীৰ্ষক ৰচনা প্ৰতিযোগিতা অনুষ্ঠিত কৰা হয় ।
লগতে পঢ়ক: ডিব্ৰুগড়ত পালন আন্তৰ্জাতিক শান্তি দিৱস
