গুৱাহাটী,12 মে’: যি সময়ত Covid 19 ৰ সংক্ৰমণৰ বাবে সমগ্ৰ বিশ্বৰ অৰ্থনীতি নিম্নগামী হৈছে, সেই সময়তে বৃহৎ পৰিমাণৰ ধনৰাশি অৰ্জন কৰিবলৈ সক্ষম হৈছে অসম পশুধন নিগমে । নিগমৰ অধ্যক্ষ মনোজ শইকীয়াই মংগলবাৰে এক সংবাদমেল সম্বোধন কৰি দ্বিতীয় পৰ্যায়ৰ লক্ ডাউনৰ পৰা বৰ্তমানলৈকে সমগ্ৰ ৰাজ্যতে অসম পশুধন নিগমে 80 কোটিতকৈও অধিক টকাৰ ব্যৱসায় কৰিবলৈ সক্ষম হোৱাৰ কথা প্ৰকাশ কৰে ।
লক্ ডাউনৰ সময়ছোৱাত নিগমে ৰাজ্যত প্ৰায় 35 কোটি টকাৰ 1,476 টন ব্ৰইলাৰ মাংস, 2 কোটি 23 লাখ টকাৰ 34.39 টন ছাগলী মাংস, 6 কোটি 93 লাখ টকাৰ 76190 কাৰ্টুন কণী বিক্ৰী কৰিবলৈ সক্ষম হৈছে । আনহাতে,মাত্ৰ গুৱাহাটী মহানগৰীতে নিগমে 43 লাখ টকাৰ 18 টন ব্ৰইলাৰ মাংস, 1 কোটি 75 লাখ টকাৰ 27 টন ছাগলীৰ মাংস আৰু 2800 প্লেট কণী বিক্ৰী কৰিবলৈ সক্ষম হৈছে । ইয়াৰ সমান্তৰালভাৱে নিগমৰ অন্তৰ্গত সামগ্ৰীসমূহ বিক্ৰীৰ বাবে 200 তকৈ অধিক শিক্ষিত নিবনুৱাই এই সময়ত কৰ্মসংস্থাপন লাভ কৰিছে । কৰ্মসংস্থাপন লাভ কৰা নিবনুৱাসকলৰ ভিতৰত পশু চিকিৎসা মহাবিদ্য়ালয় আৰু গুৱাহাটী বিশ্ববিদ্যালয়ৰ পৰা শিক্ষাগ্ৰহণ কৰা ছাত্ৰও আছে ।
উল্লেখ্য যে,কৰ’ণা ভাইৰাছৰ সমান্তৰালকৈ ৰাজ্যত গাহৰিৰ শৰীৰত দেখা দিয়া আফ্ৰিকান ছোৱাইন ফিভাৰ সন্দৰ্ভত শইকীয়াই কয়, যিহেতু ৰোগবিধৰ কোনো চিকিৎসা নাই গতিকে গাহৰি পালকসকলে সাৱধানতা অৱলম্বন কৰি থাকিব লাগিব । গাহৰিৰ ক্ষেত্ৰত দেখা দিয়া এই বেমাৰৰ বিৰুদ্ধে যুঁজিবলৈ ৰাজ্য চৰকাৰক কেন্দ্ৰ চৰকাৰৰ সাহায্যৰ প্ৰয়োজন বুলি সংবাদমেলখনত মন্তব্য কৰে মনোজ শইকীয়াই ।
লগতে চাওকঃ এগৰাকী অকলশৰীয়া মহিলাৰ কৰুণ কাহিনী...
