আছু আৰু শিল্পী সমাজে ঘোষণা কৰিলে সন্মিলিত প্ৰতিবাদী কাৰ্যসূচী

বৃহস্পতিবাৰে লতাশিলত অনুষ্ঠিত হ'ব লগা গণতান্ত্ৰিক প্ৰতিবাদী কাৰ্যসূচীত অংশগ্ৰহণৰ বাবে সমূহ ৰাইজক আহ্বান জনালে সমুজ্জল ভট্টাচাৰ্য আৰু জুবিন গাৰ্গে ৷ গণতান্ত্ৰিক আন্দোলনক উত্তাল কৰিব খোজা অশুভ শক্তিক পৰিহাৰৰ অনুৰোধ জনালে দুয়োজনে ৷

গুৱাহাটী , 11 ডিচেম্বৰঃ নাগৰিকত্ব সংশোধনী বিধেয়কৰ বিৰোধিতাৰে বুধবাৰে মহানগৰীৰ লতাশিল খেল পথাৰত সন্মিলিত হ'ল আছু আৰু শিল্পী সমাজ ৷ সদৌ অসম ছাত্ৰ সন্থাৰ মুখ্য উপদেষ্টা সমুজ্জল ভট্টাচাৰ্য আৰু জুবিন গাৰ্গ একেলগ হৈ জনসাধাৰণক শান্তিপূৰ্ণ ভাৱে প্ৰতিবাদী কাৰ্যসূচী আগবঢ়াই নিবলৈ আহ্বান জনায় ৷ কেব বিৰোধী আন্দোলনৰ পৰৱৰ্তী পদক্ষেপ গ্ৰহণ কৰিবৰলৈ 1 ঘণ্টাৰ বাবে আলোচনাত বহে আছু আৰু শিল্পী সমাজ ৷ আলোচনাৰ অন্তত বৃহস্পতিবাৰে 11 বজাৰ পৰা এক শান্তিপূৰ্ণ প্ৰতিবাদৰ সিদ্ধান্ত গ্ৰহণ কৰে আছু আৰু শিল্পী সমাজে ৷

অসমবাসীক 12 ডিচেম্বৰ , বৃহস্পতিবাৰে লতাশিলত অনুষ্ঠিত হ'ব লগা গণতান্ত্ৰিক প্ৰতিবাদী কাৰ্যসূচীত অংশগ্ৰহণৰ বাবে সমূহ ৰাইজক আহ্বান জনালে দুয়োটী সংগঠনে ৷ কিছু অশুভ শক্তিয়ে শান্তিপূৰ্ণ গণতান্ত্ৰিক আন্দোলনক উত্তাল কৰিব খুজিছে , সেই অশুভ শক্তিক পৰিহাৰ কৰি একত্ৰিত হৈ গণতান্ত্ৰিক আন্দোলনৰ বাবে আহ্বান জনালে সমুজ্জল ভট্টাচাৰ্য আৰু জুবিন গাৰ্গে ৷

লগতে পঢ়কঃৰাজ্যসভাত গৃহীত হ'ল CAB