গুৱাহাটী, ৩০ নৱেম্বৰ: মূৰৰ বিষ । দৈনন্দিন জীৱনত সঘনাই হৈ থকা এটা সমস্যা । যিটো সমস্যাত পৃথিৱীৰ প্ৰতিগৰাকী লোক এবাৰ নহয় এবাৰ ভুগিছে । এবাৰো মূৰৰ বিষৰ সমস্যা নোহোৱা মানুহ হয়তো এই পৃথিৱীত কোনোৱে নাই । চিকিৎসকৰ মতে এই মূৰৰ বিষ ৰোগৰ কথা ক’বলৈ যিমান সহজ, মূৰৰ বিষৰ চিকিৎসা কিন্তু ইমান সহজ নহয় ।
কিতাপত লিপিবদ্ধ থকা অনুসৰি প্ৰায় ১৫০ বিধ ধৰণৰ মূৰৰ বিষ আছে । এই ১৫০ বিধ ধৰণৰ মূৰৰ বিষৰ ভিতৰত এটা সচৰাচৰ কাৰণ হৈছে টেনশ্যন ৷ অতি বেছি টেনশ্যন বা চিন্তাৰ বাবেও বহু সময়ত মূৰৰ বিষ হোৱা দেখা যায় । মাইগ্ৰেনৰ বাবেও সঘনাই মূৰৰ বিষ হোৱা দেখা যায় । পুৰুষ-মহিলা উভয়ে মাইগ্ৰেনৰ সমস্যাত ভোগা দেখা যায় যদিও মহিলাৰ ক্ষেত্ৰত এই সমস্যাটো অকণমান বেছি হোৱাটো পৰিলক্ষিত হয় । বিশেষকৈ ১০ বছৰৰ পৰা ৪০ বছৰৰ ভিতৰৰ লোকসকল এই সমস্যাত বেছিকৈ ভোগা দেখা যায় ৷
মাইগ্ৰেন মূৰৰ বিষ হৈছে এপিচদিক অৰ্থাৎ এই মূৰৰ বিষ কিছুদিন থকাৰ পিচত ভাল হয় আৰু পুনৰ আৰম্ভ হোৱা দেখা যায় । মাইগ্ৰেন কিছুমান লোকৰ মূৰৰ যিকোনো অংশতে অৰ্থাৎ বাওঁফাল, সোঁ-ফাল, মূৰৰ পিছফালে, চকু ওচৰে-পাজৰে বিষ হোৱা দেখা যায় । কিছুলোকৰ আকৌ গোটেই মূৰটোতে বিষ অনুভৱ কৰা দেখা যায় । যিসকল লোকৰ এই সমস্যা আছে তেওঁলোকৰ মাহে তিনি-চাৰিবাৰ এই সমস্যা হোৱা দেখা যায় । যিসকল লোকৰ এই সমস্যাটো অকণমান বেছি থাকে তেওঁলোকৰ মাহত তিনি-চাৰিবাৰকৈও বেছি মূৰৰ বিষ হ'ব পাৰে । বৰ্তমান সময়ত বহুলোক এই সমস্যাত ভোগা পৰিলক্ষিত হৈছে ।
এই সমস্যা হোৱাৰ পূৰ্বে কিছু লক্ষণে দেখা দিয়ে । যেনে চকুৰ ওচৰে-পাজৰে বিষ অনুভৱ হয়, মূৰটো বেয়া লাগি থাকে, বমি বমি অনুভৱ হয়, কাণে গুমগুমণি শব্দ হয়, চকুৰে জিলমিল দেখিব পাৰে । এনে ধৰণৰ কিছু লক্ষণ পৰিস্ফুট হয় যাক 'অৰা' বুলি কোৱা হয় ।
ইয়াৰোপৰি এটা সঘনাই হোৱা মূৰৰ বিষ হৈছে ক্লাচটাৰ মূৰৰ বিষ । এই ধৰণৰ মূৰৰ বিষ হ’লে একেৰাহে দুই-তিনিদিন বিষ অনুভৱ হৈ থকা দেখা যায় । বহুলোকৰ ঠাণ্ডাৰ সময়ত এই মূৰৰ বিষ হোৱা দেখা যায় । কিছুমানৰ আকৌ গৰমৰ দিনত হোৱা দেখা যায় । একেধৰণে মূৰৰ যিকোনো অংশত দুই তিনিদিনলৈ বিষ অনুভৱ হৈ তাৰ পিচত ভাল হৈ যোৱা দেখা যায় ।
চাইনাচৰ বাবে মূৰৰ বিষ হোৱা দেখা যায় । ইয়াৰোপৰি মূৰত আঘাট পালেও বহু বছৰলৈ এই সমস্যাত ভোগা দেখা যায় ।
মূৰৰ বিষ হলে কি কৰা উচিত: মূৰৰ বিষ উঠা মাত্ৰকেই কোনো ধৰণৰ ঔষধ খাব নালাগে । চিকিৎসকৰ পৰামৰ্শ গ্ৰহণ কৰিহে ঔষধ খাব লাগে ।
