গুৱাহাটী, ১১ নৱেম্বৰ : পুৰুষ প্ৰধান সমাজত কিছুলোকৰ বাবে প্ৰতি মুহূৰ্ততে ঘৰুৱা হিংসাৰ বলি হ'ব লাগে একোগৰাকী নাৰী । হিংসাৰ বলি হোৱা নাৰীৰ বেদনা প্ৰসৱ বেদনাতকৈও যন্ত্ৰণাদায়ক । পীড়িত, নিৰ্যাতিত এনে বহু মহিলাৰ ঠিকনা এতিয়া নিৰ্মল আশ্ৰয় গৃহ ।
নিজৰ দুখবোৰ ঢাকি, মুখত এমোকোৰা হাঁহিলৈ প্ৰতি মুহূৰ্তত অসহনীয় বেদনাত থাকিব লাগে একাংশ নাৰী । স্বামী, ভাতৃ, পুত্ৰৰ অত্যাচাৰৰ বলি হৈ একাংশই যদি চৰমপন্থা বাছি লৈছে, একাংশই আকৌ এৰিবলগীয়া হৈছে ঘৰ । গৃহহীন এনে একাংশ নাৰীৰ বাবে এতিয়া আশ্ৰয়ৰ এক নাম ‘‘নিৰ্মল আশ্ৰয় গৃহ’’ ।
অন্য বহু আশ্ৰয় গৃহতকৈ পৃথক, নিৰ্মল আশ্ৰয় গৃহ । এই গৃহত মহিলাসকলক আশ্ৰয় দিয়াৰ উপৰিও তেওঁলোকক স্বাৱলম্বী কৰাৰ বাবে দিয়া হৈছে চিলাই কৰা, আচাৰ বনোৱা, মমবাতি বনোৱা, চকলেট বনোৱা আদিকে ধৰি বহু প্ৰশিক্ষণ । দীপাৱলীৰ এই সময়ছোৱাত এতিয়া এই আশ্ৰয় গৃহত থকা মহিলাসকল ব্যস্ত চাকি প্ৰস্তুত কৰাত ।
পাৰিবাৰিক নিৰ্যাতনৰ বলি হৈ গৃহহাৰা হোৱা মহিলাসকলক স্বাৱলম্বী তথা এটা সুস্থিৰ জীৱন প্ৰদান কৰাৰ উদ্দেশ্যে ১৯৮৭ চনতে প্ৰতিষ্ঠা হৈছিল এই আশ্ৰয় গৃহ । ভাৰতীয় সামজিক স্বাস্থ্য সংস্থাৰ অন্তৰ্গত এই নিৰ্মল আশ্ৰয় গৃহতে গৰ্ভৱস্থাত স্বামী তথা পৰিয়ালৰ নিৰ্যাতনৰ বলি হৈ ঘৰ এৰা মহিলাই সন্তানো জন্ম দিছে ।
নিৰ্মল আশ্ৰয় গৃহত প্ৰথমে যেতিয়া এগৰাকী মহিলা আহে তেতিয়া প্ৰথমে মহিলাগৰাকীক কাউন্সেলিং কৰা হয় ৷ তাৰ পিচত তেওঁৰ সমস্যটো সমাধান কৰাৰ প্ৰয়াস কৰা হয়, যদি মহিলাগৰাকীৰ ঘৰৰ লগত পুনৰ মিল হোৱাটো সম্ভৱ নহয় বা পৰিয়াললৈ উভতি যোৱা সম্ভৱ নহয়, তেন্তে তেতিয়া তেওঁলোকক তাতেই ৰাখি আইনী সাহায্য প্ৰদানৰ পৰা আৰম্ভ কৰি স্বাৱলম্বী কৰি তুলিবলৈ যিখিনি বৃত্তিমূলক প্ৰশিক্ষণৰ প্ৰয়োজন হয় সেইখিনি প্ৰদান কৰা হয় ।
১৮ বছৰৰ উৰ্দ্ধৰ আৰু ৬০ বছৰৰ তলৰ সকলো মহিলাকে এই আশ্ৰয় গৃহত আশ্ৰয় দিয়া হয় । নিৰ্মল আশ্ৰয় গৃহত মহিলাসকলক ৩ টা সন্তানসহ ৰখাৰো ব্যৱস্থা আছে । বৰ্তমান সময়ত প্ৰায় ১৯ গৰাকী মহিলা শিশুসহ এই আশ্ৰয় গৃহটোত আছে । আনহাতে, এই আশ্ৰয় গৃহত থকা মহিলাসকলে যিসমূহ সামগ্ৰী প্ৰস্তুত কৰে, সেই সামগ্ৰীসমূহ বিভিন্ন বাণিজ্যক মেলাত বিক্ৰী কৰাৰ ব্যৱস্থা কৰা হয় ।
সমাজত এতিয়া এনে বহু নাৰী আছে, যিসকলে এতিয়াও ঘৰুৱা নিৰ্যাতনৰ বলি হৈ আছে । সমাজৰ এনে পীড়িত মহিলাসকলৰ আদৰ্শ নাইবা আপুনি ক’ব পাৰে বিশ্বাস তথা নিৰাপত্তাৰ আলয় এই ‘‘নিৰ্মল আশ্ৰয় গৃহ’’ ।
লগতে পঢ়ক : Insects in paddy fields : চহা কৃষকৰ সোণোৱালী সপোনত পোকৰ ত্ৰাস
