গুৱাহাটী,১৫ মাৰ্চ: গুৱাহাটীৰ চাৰিটা সমষ্টিৰ ক্ষেত্রত কোনো সাল-সলনি নহ'ল । বিজেপিয়ে পূৰ্বৰ স্থিতি বাহাল ৰাখিলে । সমষ্টি চাৰিটাৰ প্ৰাৰ্থী তালিকাক লৈ বহু নাম চৰ্চালৈ আহিছিল যদিও কোনো পৰিবৰ্তন নহ'ল । পশ্চিম গুৱাহাটী সমষ্টিটো মিত্রদল অসম গণ পৰিষদক পুনৰ বিজেপিয়ে এৰি দিলে আৰু অসম গণ পৰিষদেও বিধায়ক ৰমেন্দ্ৰ নাৰায়ণ কলিতাকে প্ৰাৰ্থিত্ব দিলে ।
ইফালে, জালুকবাৰী সমষ্টিত এইবাৰ মন্ত্ৰী ডঃ হিমন্ত বিশ্ব শৰ্মাৰ পৰিৱৰ্তে পত্নী ৰিণিকি শৰ্মা ভূঞাই প্ৰতিদ্বন্দ্বিতা আগবঢ়াৱ বুলি চৰ্চা হৈছিল যদিও প্ৰথমখন তালিকাতে সকলো স্পষ্ট হৈ গ'ল । জালুকবাৰীত মন্ত্রী হিমন্ত বিশ্ব শৰ্মাকে প্ৰাৰ্থিত্ব প্ৰদান কৰা হ'ল । সেইদৰে দেওবাৰে প্ৰকাশ কৰা বিজেপিৰ তালিকাত দিছপুৰ সমষ্টিত অতুল বৰাক আৰু পূব গুৱাহাটী সমষ্টিত মন্ত্রী সিদ্ধাৰ্থ ভট্টাচাৰ্যক পুনৰ প্ৰাৰ্থিত্ব প্ৰদান কৰা হ'ল ।
লক্ষণীয় বিষয় যে, গুৱাহাটী লোকসভা সমষ্টিৰ অন্তৰ্গত জালুকবাৰী সমষ্টিক বাদ দি পূৱ গুৱাহাটী, দিছপুৰ আৰু পশ্চিম গুৱাহাটী বিধানসভা সমষ্টিত বৰ্তমানৰ বিধায়ক কেইজনৰ উপৰিও আন কেইবাজনো নেতা টিকটৰ দাবীদাৰ আছিল । জালুকবাৰীৰ কথা সুকীয়া । তাত মন্ত্রী ডঃ হিমন্ত বিশ্ব শৰ্মা অবিসম্বাদী নেতা । তাৰ পৰা কোনো বিজেপি নেতাই প্ৰতিদ্বন্দ্বিতা কৰাৰ সাহস নকৰে । কিন্তু পূৱ গুৱাহাটী সমষ্টিৰ বিধায়ক সিদ্ধাৰ্থ ভট্টাচাৰ্যৰ বিৰুদ্ধে মুখ্যমন্ত্রীৰ আইন উপদেষ্টা শান্তনু ভৰালী, প্ৰাক্তন মেয়ৰ মৃগেন শৰণীয়াই টিকট বিচাৰিছিল ।
শেষ মুহুৰ্তলৈকে কোনে সমষ্টিটোত বিজেপিৰ টিকট পাব তাক লৈ উৎকণ্ঠাই বিৰাজ কৰিছিল যদিও অৱশেষত বিধায়ক সিদ্ধাৰ্থ ভট্টাচাৰ্যকে প্ৰাৰ্থিত্ব দিয়া হয় । আনহাতে, বিধায়ক অতুল বৰাৰ সমষ্টি দিছপুৰৰ পৰা যুৱ নেতা জয়ন্ত দাস আৰু মৃগাংক বৰ্মনে টিকট বিচাৰিছিল আৰু একপ্ৰকাৰে প্ৰচাৰতো নামি পৰিছিল । কিন্তু এতিয়া অতুল বৰাকে প্ৰাৰ্থিত্ব প্ৰদান কৰা হ'ল । যাক লৈ ক্ষোভৰ উদগীৰণ হৈছে । টিকট বঞ্চিত জয়ন্ত দাসে মুকলিকৈ নিজৰ প্ৰতিক্ৰিয়া ব্যক্ত কৰিছে ।
ইফালে, পশ্চিম গুৱাহাটী সমষ্টিটো মিত্রদল অগপক এৰি নিদিয়াৰ দাবী জনাই বিজেপিৰ কেইবাজনো নেতাই প্ৰাৰ্থিত্ব বিচাৰিছিল । কিন্তু বিজেপিয়ে সমষ্টিটো মিত্রদল অগপক এৰি দিলে । যাক লৈ বিজেপিত ক্ষোভ আৰু অসন্তুষ্টি আছে যদিও কোনেও ৰাজহুৱাকৈ প্ৰতিক্ৰিয়া প্ৰকাশ কৰা নাই । ইফালে, পশ্চিম গুৱাহাটী সমষ্টিটো অগপক এৰি দিয়াক লৈ সমষ্টিটোৰ বিজেপি কৰ্মী আৰু সমৰ্থকসকলে ক্ষোভ ব্যক্ত কৰি প্ৰতিবাদী কাৰ্যসূচীও ৰূপায়ণ কৰিছিল । উল্লেখ্য যে, গুৱাহাটীৰ চাৰিটা সমষ্টিৰ তিনিটাত নতুন মুখ দেখা পোৱা যাব বুলি সকলোৱে আশা কৰিছিল যদিও বিজেপি পূৰ্বৰ স্থিতিতে অটল থাকিল ।
লগতে পঢ়ক: বাক্সাত ৰঙাঘৰলৈ চাৰি ডকাইত
