গুৱাহাটী, 4 মাৰ্চ : ৰাজ্যত বৰ্তমানেও অব্যাহত আছে দুৰ্নীতি তথা কামৰ বিনিময়ত হিচাপ বহিৰ্ভুত ধন আদায়ৰ কাৰবাৰ ৷ এই অপকৰ্ম কৰিব গৈ গুৱাহাটী মহানগৰীত গ্ৰেপ্তাৰ আন এজন চৰকাৰী কৰ্মচাৰী ৷ কামৰ বিনিময়ত অতিৰিক্ত ধন আদায় কৰিবলৈ গৈ মুখ্যমন্ত্ৰীৰ দুৰ্নীতি নিবাৰক আৰু তদাৰকী শাখাৰ হাতত গ্ৰেপ্তাৰ হ’বলগীয়া হ’ল মহানগৰীৰ সমবায় ভৱনৰ এগৰাকী কৰ্মচাৰী (Govt Employees arrested at Guwahati) ৷ ধুবুৰী জিলাৰ গৌৰীপুৰৰ এগৰাকী অৱসৰপ্ৰাপ্ত কৰ্মচাৰীৰ পৰা উৎকোচৰ নামত ধন আদায় কৰিছিল চৰকাৰী কৰ্মচাৰীজনে (Govt employee arrested by ACB for taking bribe) ৷
গৌৰীপুৰৰ প্ৰকাশ চন্দ্ৰ পাল নামৰ অৱসৰপ্ৰাপ্ত কৰ্মচাৰীগৰাকীৰ পৰা 5,000 টকাৰ উৎকোচ বিচাৰিছিল সমবায় ভৱনৰ কৰ্মচাৰী বিদ্যাধৰ দাস নামৰ ঘোচখোৰ কৰ্মচাৰীজনে ৷ অৱসৰপ্ৰাপ্ত চৰকাৰী কৰ্মচাৰীগৰাকীয়ে জানিবলৈ দিয়া অনুসৰি, ২০২১ বৰ্ষত সমবায় বিভাগৰ পৰা অৱসৰ গ্ৰহণ কৰিছিল পালে আৰু তাৰ পিছৰে পৰা পেঞ্চনৰ কামখিনি কৰিবৰ বাবে ভৱনটোলৈ প্ৰায়ে অহা যোৱা কৰিব লগা হৈছিল ।
অৱশ্যে পেঞ্চনৰ কামখিনি কৰি দিয়াৰ বিনিময়ত বিদ্যাধৰ দাস নামৰ ঘোচখোৰ কৰ্মচাৰীজনে অৱসৰপ্ৰাপ্ত কৰ্মচাৰীগৰাকীৰ পৰা ধন দাবী কৰি আহিছিল বুলি অৱসৰপ্ৰাপ্ত কৰ্মচাৰীগৰাকী উল্লেখ কৰে ৷ শুকুৰবাৰৰ দিনটোতো বিদ্যাধৰ দাসে পেঞ্চনৰ কাম কৰি দিয়াৰ নামত অৱসৰপ্ৰাপ্ত কৰ্মচাৰীগৰাকীৰ পৰা লৈছিল 4,000 টকা ৷ অৱসৰপ্ৰাপ্ত কৰ্মচাৰীগৰাকীয়ে উল্লেখ কৰা অনুসৰি, এদিন পূৰ্বে অৰ্থাৎ বৃহস্পতিবাৰে বিদ্যাধৰ দাসৰ হাতত প্ৰকাশ চন্দ্ৰ পালে দিছিল এহেজাৰ টকা ৷
ইয়াৰ এদিন পিছত অৰ্থাৎ শুকুৰবাৰে অতিৰিক্ত ৪ হাজাৰ টকা উৎকোচখিনি লওতেই চৰকাৰী কৰ্মচাৰীজনক হাতে লোটে আটক কৰে পূৰ্বৰে পৰা সেই স্থানত থকা দুৰ্নীতি নিবাৰক শাখাৰ দলে । জানিব পৰা মতে, সমবায় ভৱনত জ্যেষ্ঠ সহকাৰী পঞ্জীয়ক হিচাপে কৰ্মৰত আছিল বিদ্যাধৰ দাস । পৰৱৰ্তী সময়ত অভিযানকাৰী দলটোৱে সমবায় ভৱনৰ ভিতৰতে ঘোঁচখোৰ বিষয়াজনক প্ৰায় চাৰি ঘন্টা জেৰা চলোৱা বুলি অভিযানকাৰী দলটোৱে উল্লেখ কৰিলে ।
উল্লেখ্য যে, মুখ্যমন্ত্ৰীৰ দুৰ্নীতি নিবাৰক আৰু তদাৰকী শাখাই বিভিন্ন সময়ত অভিযান চলাই ৰাজ্যৰ ভিন্ন প্ৰান্তৰ পৰা বহু সংখ্যক দুৰ্নীতিগ্ৰস্ত চৰকাৰী বিষয়া কৰ্মচাৰীক গ্ৰেপ্তাৰ কৰিবলৈ সক্ষম হৈছে ৷ সম্প্ৰতি এই লৈ সৰ্বত্ৰে হৈছে বিশেষ চৰ্চা ৷ কিন্তু চৰ্চা লাভ কৰিলেও এই অভিযানে ৰাজ্যৰ পৰা দুৰ্নীতি নিৰ্মূল কৰিবলৈ কিমান দূৰ সক্ষম হয় সেইয়াহে হ’ব লক্ষণীয় বিষয় ৷
লগতে পঢ়ক : Allocation of PMAY houses: প্ৰধানমন্ত্ৰী আৱাস যোজনাৰ নামত যোৰহাটত ব্যাপক দুৰ্নীতি !
