গুৱাহাটী, ১৩ ছেপ্টেম্বৰ : গুৱাহাটী মহানগৰীত দিনে দিনে পানীৰ সমস্যাই তীব্ৰ ৰূপ ধাৰণ কৰিছে । গুৱাহাটী মহানগৰীখন পৰিষ্কাৰ কৰি ৰখা সকলৰে নিজে পৰিষ্কাৰ হ’বলৈ পানীৰ অভাৱ । এই সমস্যা মহানগৰীৰ ফটাশিল নিউ কল’নিৰ বাসিন্দাসকলৰ । গুৱাহাটী পৌৰ নিগমৰ চাফাই কৰ্মচাৰীসকলে বাস কৰা ফটাশিল নিউ কল’নিত বছৰ বছৰ ধৰি পানীৰ অভাৱ । কল’নিখনৰ বাসিন্দাসকলে প্ৰায় ২০০ ৰ পৰা ৩০০মিটাৰ দূৰৰ পৰা পানী কঢ়িয়াই আনি পৰিয়ালক পানীৰ যোগান ধৰি আহিছে ।
কল’নিখনৰ বাসিন্দা তথা সমাজকৰ্মী আৰ এন প্ৰসাদে এই সন্দৰ্ভত ইটিভি ভাৰতৰ সাংবাদিকৰ আগত কয়, ফটাশিল নিউ কল’নিত পানী সমস্যা দীৰ্ঘদিনীয়া ৷ কল’নিখনৰ ১৪ টা বিল্ডিঙত প্ৰায় ৪০০ টা পৰিয়ালে বসবাস কৰে । কিন্তু সেই কল’নিত তীব্ৰ পানীৰ সংকট । কল’নিখনত পানী যোগানৰ বাবে জি এম চিৰ দুটাকৈ পাম্প আছে । দুয়োটা পানীৰ পাম্প চলিলেও কল’নিখনৰ ৭ টা বিল্ডিঙৰ বাসিন্দাইহে পানী লাভ কৰে । তদুপৰি প্ৰতি তিনি-চাৰি মাহৰ মূৰত ইয়াত পানী পাইপ বিকল হৈ পৰে ৷
ইফালে পানীত যথেষ্ট পৰিমাণৰ আইৰণ থকাৰ ফলত সেই পানী ব্যৱহাৰ কৰি বিভিন্ন ৰোগত আক্ৰান্ত হৈছে একাংশ বাসিন্দা । বৰ্তমান জিএমচিৰ নিউ কল’নিখনৰ এটা পানীৰ পাম্প বিগত প্ৰায় ১৫ দিন ধৰি বিকল হৈ থকাৰ ফলত তীব্ৰ পানীৰ সংকটত ভুগিছে বাসিন্দাসকলে । বাসিন্দাসকলে বাৰম্বাৰ জি এম চি কৰ্তৃপক্ষক পানীৰ পাম্পটো মেৰামতি কৰিবলৈ আহ্বান জনাই আহিছে যদিও বৰ্তমানলৈ কোনো ব্যৱস্থা গ্ৰহণ নকৰাত বাসিন্দাসকলে ক্ষোভ প্ৰকাশ কৰিছে ।
লগতে পঢ়ক: Load shedding issue in Assam : এনে গৰম আগতে হোৱা নাছিল, ৰজাৰ বিৰুদ্ধে সৰ্বত্ৰে প্ৰজাৰ বিদ্ৰোহ
