গুৱাহাটী,২০ মে': শুকুৰবাৰ অৰ্থাৎ কাইলৈৰ পৰা তিনিদিনীয়া কাৰ্যক্ৰমণিকাৰে আৰম্ভ হব নৱনিৰ্বাচিত পঞ্চদশ অসম বিধানসভাৰ প্ৰথমখন অধিবেশন । ইতিমধ্যে সকলো ধৰণৰ ক'ভিড প্ৰট'কলৰ মাজেৰে অধিবেশন অনুষ্ঠিত কৰিবলৈ সাজু হৈ উঠিছে অসম বিধানসভা সচিবালয় । বৃহস্পতিবাৰে সমগ্ৰ বিধানসভা চৌহদ চেনিটাইজ কৰা হয় ।
উল্লেখযোগ্য যে, শুকুৰবাৰে অৰ্থাৎ অধিবেশনৰ প্ৰথম দিনটোতে বিধায়ক হিচাপে শপত লব অসমৰ ১২৫ টা বিধানসভা সমষ্টিৰ পৰা জয়ী হৈ অহা বিধায়ক সকলে । ইতিমধ্যে বঙাইগাঁও সমষ্টিৰ বিধায়ক তথা প্ৰাক্তন মন্ত্ৰী ফণীভূষণ চৌধুৰীয়ে প্ৰ’টেম অধ্যক্ষৰূপে শপত গ্ৰহণ কৰিছে । কাইলৈ প্ৰটেম অধ্যক্ষ গৰাকীয়েই শপতবাক্য পাঠ কৰোৱাব আন ১২৫ গৰাকী জনপ্ৰতিনিধিক ।
মনকৰিবলগীয়া যে, পঞ্চদশ বিধানসভালৈ যি ১২৬ গৰাকী বিধায়ক এইবাৰ জয়ী হৈ আহিছে তেওঁলোকৰ ভিতৰত ৪৬ গৰাকীয়েই হৈছে নতুন মুখৰ । অৰ্থাৎ প্ৰথমবাৰৰ বাবে গৰকিব বিধানসভাৰ মজিয়া । এইসকলৰ ভিতৰত আছে কৃষক নেতা অখিল গগৈও । কাইলৈ বিধানসভাত শপত গ্ৰহণৰ বাবে ইতিমধ্যে অখিল গগৈক অনুমতি দিছে আদালতে ।
শুকুৰবাৰৰ দিনটোতে বিধানসভাত আনুষ্ঠানিকভাৱে নতুন অধ্যক্ষ হিচাপে বিধায়ক বিশ্বজিৎ দৈমাৰীৰ নাম ঘোষণা কৰা হ’ব । অধিবেশনৰ দ্বিতীয় দিনা পঞ্চদশ বিধানসভাত প্ৰথমটো ভাষণ দিব ৰাজ্যপাল জগদীশ মুখীয়ে ।
ইপিনে অধিবেশনৰ দ্বিতীয় আৰু তৃতীয় তথা অন্তিম দিনা ৰাজ্যপালৰ ভাষণৰ ওপৰত বিতৰ্ক অনুষ্ঠিত হ’ব । অধিবেশনৰ শেষৰ দিনটোতে নৱনিযুক্ত অধ্যক্ষ বিশ্বজিৎ দৈমাৰীয়ে বিধানসভাৰ উপাধ্যক্ষ পদৰ বাবে ডাঃ নোমল মমিনৰ নাম ঘোষণা কৰিব ।
