গুৱাহাটী, 26 অক্টোবৰ : মুখ্যমন্ত্ৰী ড৹ হিমন্ত বিশ্ব শৰ্মালৈ কাৰণ দৰ্শোৱাৰ জাননী জাৰি কৰিছে নিৰ্বাচন আয়োগে ৷ নিৰ্বাচনী আচৰণ বিধি ভংগ কৰাৰ অভিযোগত মুখ্যমন্ত্ৰীগৰাকীলৈ জাননী প্ৰেৰণ কৰিছে নিৰ্বাচন আয়োগে ৷ মঙলবাৰে বিয়লি ৫ বজাৰ ভিতৰত মুখ্যমন্ত্ৰীগৰাকীয়ে নিৰ্বাচন আয়োগক উত্তৰ দিব লাগিব ৷ মুখ্যমন্ত্ৰীৰ বিৰুদ্ধে নিৰ্বাচনী প্ৰচাৰ সভাত চৰকাৰী আঁচনি ঘোষণা কৰাৰ অভিযোগ উত্থাপন হৈছে ৷ এই সন্দৰ্ভত কংগ্ৰেছে ৰাজ্যৰ মুখ্য নিৰ্বাচনী বিষয়াৰ ওচৰত অভিযোগ দাখিল কৰিছিল ৷
উল্লেখ্য যে, ৰাজ্যৰ পাঁচটা সমষ্টিত ৩০ অক্টোবৰত অনুষ্ঠিত হ'ব উপ নিৰ্বাচন ৷ যাৰ বাবে ৰাজ্যৰ সকলো দলেই নিজ নিজ দলৰ প্ৰাৰ্থীৰ প্ৰচাৰ অভিযানত নামি পৰিছে। এইক্ষেত্ৰত পিছ পৰি থকা নাই মুখ্যমন্ত্ৰী হিমন্ত বিশ্ব শৰ্মা ৷ কিন্তু নিৰ্বাচনী প্ৰচাৰ চলাবলৈ গৈ মুখ্যমন্ত্ৰীয়ে নিৰ্বাচনী আচৰণ বিধি উলংঘা কৰি ঘোষণা কৰিছে বহু আঁচনি ৷ যাক লৈ বিৰোধী দলে প্ৰতিক্ৰিয়া ব্যক্ত কৰাৰ লগতে আয়োগত অভিযোগ দাখিল কৰিছিল ৷ যাৰ পৰিপ্ৰেক্ষিতত মুখ্যমন্ত্ৰী হিমন্ত বিশ্ব শৰ্মাই নিৰ্বাচন আয়োগৰ পৰা লাভ কৰিছে কাৰণ দৰ্শোৱাৰ জাননী ৷
বিজেপি তথা মিত্ৰজোঁট ইউপিপিএল দলৰ প্ৰাৰ্থীৰ হৈ নিৰ্বাচনী প্ৰচাৰ চলোৱাৰ নামত মুখ্যমন্ত্ৰীয়ে ভোটাৰ ৰাইজক আকৰ্ষিত কৰাৰ বাবে বাট-পথ, দলং আদি নিৰ্মাণৰ লগতে বিভিন্ন আঁচনিৰ ঘোষণা কৰে ৷ যাৰ ভিডিঅ' আৰু বাতৰি তথ্য প্ৰমাণ হিচাপে নিৰ্বাচনী আয়োগক প্ৰদান কৰি নিৰ্বাচনী বিধি উলংঘা কৰাৰ অভিযোগ তুলিছিল কংগ্ৰেছে ৷ যাৰ পিছতে সকলো ভিডিঅ' আৰু তথ্য প্ৰমাণ আদি চাই নিৰ্বাচনী আয়োগে মুখ্যমন্ত্ৰীলৈ কাৰণ দৰ্শোৱাৰ জাননী প্ৰেৰণ কৰে ৷
মঙলবাৰে সন্ধিয়া ৫ বজালৈ ইয়াৰ উত্তৰ দিবলৈ সময়সীমা বান্ধি দিয়া হৈছে ৷ জাননীত উল্লেখ কৰা অনুসৰি, যদি মুখ্যমন্ত্ৰীয়ে সন্ধিয়া ৫ বজাৰ ভিতৰত কাৰণ দৰ্শোৱা জাননীৰ উত্তৰ নিদিয়ে, তেন্তে আয়োগৰ ফালৰ পৰা তদন্ত কৰা হ'ব ৷ অভিযোগ অনুসৰি মুখ্যমন্ত্ৰীয়ে দলৰ প্ৰাৰ্থীৰ হৈ ভৱানীপুৰ, থাওৰা আৰু মৰিয়নী সমষ্টিত বিজেপিৰ ষ্টাৰ প্ৰচাৰক হিচাপে প্ৰচাৰৰ সময়ত ভোটদাতাসকলৰ আগত চিকিৎসা মহাবিদ্যালয়, দলং, বাট-পথ, শিক্ষানুষ্ঠান, ষ্টেডিয়াম নিৰ্মাণ কৰাৰ লগতে খেলৰ পৰিসৰ বৃদ্ধি কৰাৰ ঘোষণা কৰে ৷
লগতে চাওক: মহানগৰীত শোৱাপাটীতে দম্পতীক হত্যা
