গুৱাহাটী, 25 জানুৱাৰীঃ পুনৰ শিক্ষামন্ত্ৰীৰ দায়িত্বভাৰ গ্ৰহণ কৰাৰ পাচত শনিবাৰে জনতাভৱনত এখন সংবাদমেল সম্বোধন কৰে মন্ত্ৰী ড৹ হিমন্ত বিশ্ব শৰ্মাই ৷ শিক্ষাবিভাগৰ ক্ষেত্ৰত লোৱা বিভিন্ন নতুন পৰিকল্পনা সম্পৰ্কে সংবাদমেলত বিতংভাৱে উল্লেখ কৰে মন্ত্ৰীগৰাকীয়ে ৷
অহা এপ্ৰিল মাহৰ ভিতৰত 15 হাজাৰ প্ৰাথমিক শিক্ষকক নিযুক্তি দিয়াৰ কথা ঘোষণা কৰে মন্ত্ৰী হিমন্ত বিশ্ব শৰ্মাই ৷ ফেব্ৰুৱাৰী মাহৰ ভিতৰত মাধ্যমিক টেট পৰীক্ষাৰ ফলাফল ঘোষণা কৰি 4 হাজাৰ মাধ্যমিক শিক্ষকক নিযুক্তি দিয়াৰ কথা প্ৰকাশ সংবাদমেলত ৷
আনহাতে শিক্ষাবিভাগত এখন নতুন আইন প্ৰণয়ন কৰাৰ কথাও প্ৰকাশ কৰে মন্ত্ৰী শৰ্মাই ৷ এই আইন অনুসৰি হাইস্কুল শিক্ষান্ত পৰীক্ষালৈকে যি ছাত্ৰ-ছাত্ৰীৰ এটা বিষয়ও অসমীয়া নাথাকে, তেনে ছাত্ৰ-ছাত্ৰীয়ে ভৱিষ্যতে অসমত কোনো চাকৰি নাপাব বুলি জনায় মন্ত্ৰীগৰাকীয়ে ৷ বিদ্যালয়ত অসমীয়া ভাষা বাধ্যতামূলক কৰা বাবে বাজেটত এই নতুন আইন অন্তৰ্ভুক্ত কৰা হ'ব ৷ এই সন্দৰ্ভত কোনো শিক্ষক সন্থাৰ সৈতে আলোচনাত মিলিত নহয় মন্ত্ৰীগৰাকী ৷ শিক্ষক সংগঠন সমূহক দিছপুৰ আৰু কাহিলীপাৰালৈ নাহিবলৈ আহ্বান মন্ত্ৰীগৰাকীৰ ৷ ৱেবচাইটযোগে মন্ত্ৰীগৰাকীক সকলো অভিযোগ অৱগত কৰিব পাৰিব শিক্ষকসকলে ৷
2020 বৰ্ষত প্ৰথম শ্ৰেণীৰ পৰা অষ্টম শ্ৰেণীলৈ প্ৰতিগৰাকী ছাত্ৰ-ছাত্ৰীক চৰকাৰে যোগান ধৰিব 4 যোৰকৈ ইউনিফৰ্ম ৷ ইয়াৰে এজোৰ ইউনিফৰ্ম হ'ব খেলা-ধুলাৰ বাবে ৷ নৱম আৰু দশম শ্ৰেণী প্ৰতিগৰাকী ছাত্ৰ-ছাত্ৰীক বছৰি যোগান ধৰা হ'ব দুজোৰকৈ ইউনিফৰ্ম ৷ প্ৰতিযোৰ ইউনিফৰ্মৰ বাবদ খৰচ হ'ব 350 টকাত ৷ বিদ্যালয় পৰিচালনা সমিতিয়ে যোগান ধৰিব এই ইউনিফৰ্ম ৷
ইয়াৰ লগতে মন্ত্ৰীগৰাকীয়ে ঘোষণা কৰে যে, 15 আগষ্টৰ ভিতৰত 4993 খন প্ৰাথমিক আৰু মাধ্যমিক বিদ্যালয় প্ৰাদেশিকীকৰণ কৰা হ'ব ৷ এই বিদ্যালয়সমূহত মুঠ 13562 টা শিক্ষকৰ পদ প্ৰাদেশিকীকৰণ কৰাৰ কথা ঘোষণা মন্ত্ৰীগৰাকীৰ ৷ ইয়াৰ সমান্তৰালকৈ 15 আগষ্টৰ পূৰ্বেই 626 খন হাইস্কুল প্ৰাদেশিকীকৰণ কৰি 4828 টা শিক্ষকৰ পদ নিয়মীয়া কৰা হ'ব ৷ 5800 ঠিকাভিত্তিক হাইস্কুলৰ শিক্ষকৰ দৰমহা নিয়মীয়া শিক্ষকৰ দৰমহাৰ হাৰত প্ৰদানৰ লগতে অন্যান্য সা-সুবিধা প্ৰদানৰ বাবেও এখন আইন প্ৰণয়ন কৰাৰ কথা ঘোষণা কৰে মন্ত্ৰীগৰাকীয়ে ৷ সৰ্বশিক্ষাৰ অধীনত কাম কৰি থকা 3200 টেট শিক্ষকৰ চাকৰি প্ৰায় নিয়মীয়াকৰণ হ'ব বুলি জনায় হিমন্ত বিশ্ব শৰ্মাই ৷
উচ্চ শিক্ষা প্ৰতিষ্ঠানৰ ক্ষেত্ৰটো কেতবোৰ পৰিকল্পনা গ্ৰহণ কৰিছে হিমন্ত বিশ্ব শৰ্মাই ৷ সেই অনুসৰি 30 খন নতুন মহাবিদ্যালয় প্ৰাদেশিকীকৰণ লগতে 900 কলেজ শিক্ষকৰ চাকৰি নিয়মীয়া কৰা হ'ব ৷ ইয়াৰ লগতে মন্ত্ৰীগৰাকীয়ে উল্লেখ কৰে যে, যোৱা ডেৰ বছৰত যিমান শিক্ষকৰ বদলি হ'ল, সেইসকলোবোৰ পুনৰীক্ষণ কৰা হ'ব আৰু প্ৰয়োজন সাপেক্ষে পুনৰ পূৰ্বৰ স্থানলৈ যাব লাগিব শিক্ষকসকল ৷
বড়ো সমস্যাৰ শান্তিপূৰ্ণ সমাধানৰ বাবে নতুন ইউটিচি গঠনৰ সন্দৰ্ভত হিমন্ত বিশ্ব শৰ্মাই কয় যে, নতুন UTC গঠন নহয় আৰু অসমতো কোনো বিভাজন নহয় ৷ শোণিতপুৰ জিলাখনক ভাগ ভাগ কৰিব বুলি অপপ্ৰচাৰ চলোৱা হৈছে,কোনো নতুন গাঁও অন্তৰ্ভুক্ত নহয় ৷ বি টি এডিত শান্তি প্ৰতিষ্ঠাৰ বাবেহে হ'ব এই চুক্তি, কেন্দ্ৰীয় চৰকাৰে এই সম্পৰ্কে অসম চৰকাৰক জনাইছে বুলি জানিবলৈ দিয়ে হিমন্ত বিশ্ব শৰ্মাই ৷
