গুৱাহাটী, 19 চেপ্তেম্বৰঃ সমগ্ৰ দেশতে দেখা দিয়া বিত্তীয় মন্দাৱস্থাই ৰাজ্যৰ সৰ্বস্তৰতে ক্ষতি কৰিছে ৷ বিজেপি চৰকাৰৰ দিনত সংঘটিত হোৱা এই মন্দাৱস্থাৰ বাবে বহুকেইটা বিষয়ক জগৰীয়া কৰিছে দেশবাসীয়ে ৷ জিএচটিকে ধৰি বিমুদ্ৰাকৰণৰ দৰে অপৰিপক্ক নীতিয়ে দেশৰ জিডিপিৰ হাৰ সৰ্বনিম্ম হোৱাত বহুগুণে সহায় কৰিছে ৷ এনে পৰিস্থিতিত অসমৰ ৰাইজে কি কয় তাৰ বাবে আমি কাষ চাপিছিলো ছাত্ৰ সমাজক প্ৰতিনিধিত্ব কৰা ছাত্ৰনেতাৰ লগতে ব্যৱসায়ী সমাজক প্ৰতিনিধিত্ব কৰা এগৰাকী চাটাৰ্ড একাউন্টটেন্টৰ ওচৰত ৷ ছাত্ৰসমাজৰ হৈ সমগ্ৰ বিষয়টো সন্দৰ্ভত প্ৰতিক্ৰিয়া ব্যক্ত কৰে সদৌ কামৰূপ (মহানগৰ) জিলা ছাত্ৰ সন্থাৰ সাধাৰণ সম্পাদক দিব্যজ্যোতি মেধি আৰু ব্যৱসায়ী সমাজক প্ৰতিনিধিত্ব কৰা চাটাৰ্ড একাউন্টটেন্ট প্ৰদীপ কুমাৰ নাহাতায়ে ৷
ইটিভি ভাৰতৰ সৈতে দেশৰ অৰ্থনৈতিক অৱস্থাৰ ওপৰত প্ৰতিক্ৰিয়া ব্যক্ত কৰি দিব্যজ্যোতি মেধিয়ে কয় যে, দেশৰ বিত্তীয় মন্দাৱস্থাই সমগ্ৰ অসমতে ক্ষতি কৰিছে ৷ যদি পৰিস্থিতিৰ পৰিৱৰ্তন নঘটে তেন্তে অসমে খুব কম সময়তে এক জটিল পৰিস্থিতিৰ সন্মুখীন হ'ব ৷ বিশেষকৈ অট'মোবাইল খণ্ডৰ নিম্মগামী প্ৰভাৱৰ লগতে নিত্য ব্যৱহাৰ্য সামগ্ৰীৰ আকাশলংঘী মূল্য আৰু থলুৱা লোকৰ চাকৰি হ্ৰাস আদি দিশসমূহে বিত্তীয় ব্যৱস্থাৰ ভয়াৱহ দিশটোকে প্ৰকাশ কৰিছে ৷ ইতিমধ্যে নিটি আয়োগৰ উপাধ্যক্ষয়ো এই কথা স্বীকাৰ কৰিছে যে, দেশৰ আৰ্থিক অৱস্থাই ভয়াৱহ দিশলৈ গতি কৰি আছে ৷
আনহাতে চাটাৰ্ড একাউন্টটেন্ট প্ৰদীপ কুমাৰ নাহাতায়ে অৰ্থনৈতিক অৱস্থাৰ ওপৰত প্ৰতিক্ৰিয়া ব্যক্ত কৰি কয় যে, গোটেই বিশ্বত অৰ্থনৈতিক সমস্যা আছে, ভাৰতো ইয়াৰ ব্যতিক্ৰম নহয় ৷ অসমত বিগত 3 বছৰ ধৰি অৰ্থনৈতিক সংকট চলি আছে যদিও অসমৰ বিত্তীয় অৱস্থা যথেষ্ট ভাল আৰু বেয়াও নহয়, মধ্যম অৱস্থাত চলি আছে ৷ যদিহে পূবলৈ চোৱা নীতি সঁচাকৈ কাৰ্যকৰী হয় তেতিয়াহ'লে অসমৰ অৰ্থনীতি উন্নত হোৱাৰ বহুটো সম্ভাৱনা আছে ৷ জিএচটিয়ে সমগ্ৰ দেশৰ ক্ষুদ্ৰ ব্যৱসায়ীসকলৰ ওপৰত বেয়া প্ৰভাৱ পেলাইছে ৷ এইক্ষেত্ৰত অসমৰ ভূমি অধিগ্ৰহণ নীতিত যথেষ্ট শুধৰণিৰ থল আছে ৷ ভূমি অধিগ্ৰহণ নীতিৰ শুধৰণি ঘটালে বাহিৰৰ পৰা অহা ব্যৱসায়ীসকলে অসম তথা সমগ্ৰ উত্তৰ-পূৰ্বাঞ্চলতে উদ্যোগখণ্ডত বৃহৎ পৰিৱৰ্তন সাধন কৰিবলৈ সক্ষম হ'ব ৷
