নিউজ ডেক্স , 4 অক্টোবৰঃ সমগ্ৰ দেশতে আৰম্ভ হ'ল শাৰদীয় দুৰ্গোৎসৱ ৷ ৰাজ্যৰ প্ৰত্যেকটো প্ৰান্তত এতিয়া উখল মাখল পৰিবেশ ৷ ব্যতিক্ৰমীভাৱে আৰু নতুন ধাৰণাৰে পূজা মণ্ডপক সজাই তোলাৰ চেষ্টা প্ৰত্যেকখন পূজাৰ আয়োজক সমিতিৰ ৷ গছেৰে পৰিপূৰ্ণ এখন ব্যতিক্ৰমী দূর্গাপূজাৰ মণ্ডপেৰে পৰিবেশ সংৰক্ষণৰ প্ৰতি সচেতনতা অনাৰ এক প্ৰশংসনীয় পদক্ষেপ গ্ৰহণ কৰিছে গোৱালপাৰা চহৰৰ চক বাজাৰ পূজা সমিতিয়ে ৷ প্ৰত্যেকজন ভক্তপ্ৰাণ ৰাইজক একোটাকৈ গছৰ পুলিৰে সম্ভাষণ জনোৱাৰো প্ৰশংসনীয় পদক্ষেপ পূজা সমিতিখনৰ ৷
ধ্বনি কবি বিনন্দ চন্দ্ৰ বৰুৱা, ডাঃ দূৰ্গা ফুকনৰ দৰে ব্যক্তিৰ সান্নিধ্যত গঢ় লৈ উঠা টীয়কৰ ঐতিহাসিক হাতখোলা সহায়ী মন্দিৰত হিন্দু ধৰ্মোৎসৱ সংঘৰ উদ্যোগত শক্তি নাশিনী দেবী দূৰ্গাৰ পূজাৰ ব্যাপক আয়োজন পূজা সমিতিৰ ৷ জাক জমকতাৰ পৰা আঁতৰি সম্পূৰ্ণ আধ্যাত্মিকতাৰে পূজাৰ আয়োজনেই হিন্দু ধৰ্মোৎসৱ সংঘৰ পূজাৰ বিশেষত্ব ৷
মন্ত্ৰী চন্দ্ৰ মোহন পাটোৱাৰী, বিশিষ্ট ঔপন্যাসিক, লেখক, শিক্ষাবিদ ৰিতা চৌধুৰী, নলবাৰী জিলা পৰিষদৰ সদস্যা ৰিতামনি ডেকাৰ উপস্থিতিত পতাকা উত্তোলন, স্মৃতি তৰ্পণ, বন্তি প্ৰজ্বলন, বৃক্ষৰোপণ, আদি কাৰ্যসূচীৰে ষষ্ঠীৰ দিনা পুৱা পূজাৰ কাৰ্যসূচী আৰম্ভ কৰিলে নলবাৰী জিলাৰ ককয়া বাৰোৱাৰী শ্ৰী শ্ৰী দুৰ্গা পূজা মহোৎসৱৰ আয়োজক সমিতিয়ে ।
আনহাতে বিলাসীপাৰাৰ আনন্দ নগৰ - বাঙালীপাৰা গাঁও পঞ্চায়তৰ অধীনস্থ ভোটেৰকান্দা গাঁৱৰ গাঁও পঞ্চায়তৰ সভাপতি জামাল হকে হিন্দু ধৰ্মৰ দৰিদ্ৰ লোকৰ মাজত শাৰী, ধূতি, চোলা, পেন্ট আদি সামগ্ৰী বিতৰণ কৰি পৰিচয় দিয়ে মহানুভৱতাৰ ৷
আনহাতে ডিব্ৰুগড়ৰ মাৰোৱাৰী পট্টী পূজা সমিতিয়ে তেওঁলোকৰ ৭৫ বছৰীয়া তথা হীৰকজয়ন্তী পূজা উপলক্ষে সু-বিশাল মণ্ডপেৰে অতি জাক জমকতাৰে আয়োজন কৰা "সপোন পুৰী" চাবলৈ কেন্দ্ৰীয় মন্ত্ৰী ৰামেশ্বৰ তেলী, বিধায়ক প্ৰশান্ত ফুকন, ঋতুপৰ্ণ বৰুৱা দলীয় নেতা সকলৰ সৈতে মাজ নিশা উপস্থিত হ'ল পূজা মণ্ডপত ৷
৬২ বছৰত ভৰি দিয়া ডিব্ৰুগড় জালুকপাৰা দূৰ্গা পূজা সমিতিৰ উদ্যোগত সুবিশাল পাহাৰৰ ওপৰত নিৰ্মাণ কৰা দেৱভুমি কেদাৰনাথ,বদ্ৰীনাথ,গংগোত্ৰী আৰু যমুনোত্ৰী এই চাৰিটা ধামৰ আৰ্হিত আয়োজিত পূজা ভাগত উপস্থিত হৈ দেৱী দূৰ্গাৰ ওচৰত সকলোৱে বাবে মংগল প্ৰাৰ্থনা কৰে মুখ্যমন্ত্ৰী সৰ্বানন্দ সোণোৱালে ৷
1863 চনত জানকী নাথ মুখাৰ্জীয়ে আৰম্ভ কৰা তেজপুৰৰ মুখাৰ্জী বাৰীৰ দুৰ্গা পূজাত 1920 চনৰ পৰাই বন্ধ হৈ আহিছে জীৱ জন্তুৰ বলি-বিধান ৷ এই পূজাৰ আন এটা বিশেষত্ব হ'ল, পূজাৰ দেৱী অনা হয় দোলাৰ দৰে কান্ধত তুলি আৰু দেৱী বিসৰ্জনৰ বাবেও এইদৰেই নিয়া হয় ।
সৰ্বমুঠ ৪৯২খন পূজাৰ আয়োজন কৰা গুৱাহাটী মহানগৰীত পূজাৰ সময়ত যাতে কোনো অপ্ৰিতীকৰ পৰিস্থিতিৰ উদ্ভৱ নহয়, তাৰ বাবে সম্পূৰ্ণ হৈ পৰিছে প্ৰশাসন ৷ প্ৰশাসন সম্পূৰ্ণ সাজু যদিও পৰিস্থিতি সুস্থিৰ কৰি ৰাখিবলৈ পূজা সমিতি আৰু ৰাইজক আহ্বান জনায় আৰক্ষী আয়ুক্ত দীপক কুমাৰে ৷
