নিউজ ডেস্ক, 16 জানুৱাৰী : ৰাজ্যৰ পৰৱৰ্তী মুখ্য সচিব হ’ব জ্যেষ্ঠ আই এ এছ বিষয়া ড৹ ৰবি কোটা ৷ 31 মাৰ্চত পৰৱৰ্তী মুখ্য সচিব হিচাবে দায়িত্বভাৰ গ্ৰহণ কৰিব এইগৰাকী সুদক্ষ প্ৰশাসনিক বিষয়াই ৷ 1993 বেটছৰ অসম মেঘালয় কেডাৰৰ ড৹ ৰবি কোটা সম্প্ৰতি ৰাজ্য চৰকাৰৰ গৃহ আৰু ৰাজনৈতিক বিভাগৰ অতিৰিক্ত মুখ্য সচিব পদত অধিষ্ঠিত হৈ আছে ৷
উল্লেখ্য যে, বৰ্তমানৰ মুখ্য সচিব পবন কুমাৰ বৰঠাকুৰে 31 মাৰ্চত অৱসৰ গ্ৰহণ কৰিব ৷ মন কৰিবলগীয়া, বৰঠাকুৰৰ কাৰ্যকাল ইতিমধ্যে উকলিছিল যদিও যোৱা সময়চোৱাত তিনি মাহৰ বাবে ৰাজ্য চৰকাৰে তেওঁৰ কাৰ্যকাল বৃদ্ধি কৰিছিল ৷ সেই অনুসৰি, তেওঁৰ বৰ্ধিত কাৰ্যকাল 31 মাৰ্চত সমাপ্ত হ’ব আৰু সেই দিনাই ড৹ ৰবি কোটাই ৰাজ্যৰ পৰৱৰ্তী মুখ্য সচিব হিচাবে দায়িত্বভাৰ গ্ৰহণ কৰিব ৷
ইতিমধ্যে বৰঠাকুৰৰ অৱসৰৰ পাচত মুখ্য সচিবৰ আসনত কোন অধিষ্ঠিত হ’ব তাকে লৈ দিছপুৰত সৰৱ চৰ্চা চলাৰ লগতে আন কেবাগৰাকীও শীৰ্ষ আই এ এছ বিষয়াৰ নাম মুখে মুখে বাগৰিছিল ৷ কিন্তু শেষ মুহূৰ্তত ড৹ ৰবি কোটাই পৰৱৰ্তী মুখ্য সচিব হোৱাটো নিশ্চিত হৈছে ৷
