কামৰূপ,19 মাৰ্চঃ বৃহস্পতিবাৰে গুৱাহাটী কেন্দ্ৰীয় কাৰাগাৰৰ পৰা চিকিৎসাৰ বাবে GMCH লৈ অনা হয় কৃষক মুক্তি সংগ্ৰাম সমিতিৰ যুটীয়া সাধাৰণ সম্পাদক ধৈৰ্য্য কোঁৱৰক ৷ বিগত তিনিদিন ধৰি প্ৰচণ্ড মূৰৰ বিষ আৰু জ্বৰত ভুগি আছিল কৃষক মুক্তি সংগ্ৰাম সমিতিৰ যুটীয়া সাধাৰণ সম্পাদক গৰাকী ৷ ধৈৰ্য্য কোঁৱৰৰ অভিযোগ কাৰাগাৰত নাই পৰ্যাপ্ত চিকিৎসা ব্যৱস্থা ৷ উল্লেখ্য যে, যি সময়ত কৰ‘ণা ভাইৰাছে মহামাৰী ৰূপ ধাৰণ কৰিছে সেই সময়ত গুৱাহাটীৰ কেন্দ্ৰীয় কাৰাগাৰত কোনোধৰণৰ সজাগতা ব্যৱস্থা গ্ৰহণ কৰা নাই কাৰাগাৰ কৰ্তৃপক্ষই ৷
আনহাতে, বৃহস্পতিবাৰে পুৱাৰ ভাগতে অখিল গগৈক শিৱসাগৰলৈ লৈ যোৱা সম্পৰ্কত মন্তব্য প্ৰকাশ কৰি তেখেতে কয় যে, অখিল গগৈক সৰ্বানন্দ সোণোৱাল নেতৃত্বাধীন চৰকাৰখনে ষড়যন্ত্ৰমূলক ভাৱে বন্দী কৰি ৰাখিব বিচাৰিছে ৷ কিন্তু অখিল গগৈৰ মুক্তিৰ দাবী কেৱল ৰাজ্যতে নহয় বিশ্বৰ ভিন্ন প্ৰান্তত হৈ আছে ৷ নিয়া আদালতৰ পৰা জামিন লাভ কৰাৰ পিছতো শিৱসাগৰ আৰক্ষীয়ে অখিল গগৈক গ্ৰেপ্তাৰ কৰা কাৰ্যক সম্পূৰ্ণ ষড়যন্ত্ৰমূলক আখ্যা দিয়ে ধৈৰ্য কোঁৱৰে ৷
