গুৱাহাটী,2 ফ্ৰেব্ৰুৱাৰী: অসম আৰক্ষীৰ উলুবাৰীস্থিত মুখ্য কাৰ্য্যালয়ৰ সভাকক্ষত বৃহস্পতিবাৰে আৰক্ষী সঞ্চালক প্ৰধান জি পি সিঙৰ(DGP GP Singh) উপস্থিতিত অনুষ্ঠিত হয় এখন গুৰুত্বপূৰ্ণ বৈঠক । বৈঠকত আৰক্ষী অধীক্ষক পৰ্যায়ৰ পৰা উচ্চ পৰ্যায়লৈ সকলো বিষয়াই অংশ গ্ৰহণ কৰে । গুৱাহাটীত কৰ্মৰত বিষয়াসকল সভাকক্ষত উপস্থিত থকাৰ বিপৰীতে ৰাজ্যৰ অন্যান্য জিলাসমূহত কৰ্মৰত বিষয়াসকলে ‘ভার্চুৱেল’ মাধ্যমেৰে বৈঠকত অংশ লয় ।
এই বৈঠকত গ্ৰহণ কৰা হয় কেতবোৰ গুৰুত্বপূৰ্ণ সিদ্ধান্ত । সেই অনুসৰি অসম আৰক্ষীৰ মুখ্য কাৰ্যালয় আৰু ৰাজ্যৰ সকলোবোৰ আৰক্ষী অধীক্ষকৰ কাৰ্যালয়ত প্ৰতিটো কৰ্মদিনত পুৱা 11.30 বজাৰ পৰা বিয়লি 1.30 বজালৈ এজন বিষয়া উপস্থিত থকাটো নিশ্চিত কৰিব লাগিব । বিষয়াগৰাকীয়ে ৰাইজৰ লগত মত-বিনিময় কৰি তেওঁলোকৰ অভাৱ-অভিযোগসমূহ নিৰাময়ৰ ব্যৱস্থা কৰিব । এই ব্যৱস্থা অহা 13 ফেব্ৰুৱাৰীৰ পৰা আৰম্ভ হ’ব(New instructions for Assam police) ।
সেইদৰে জৰুৰী অৱস্থাৰ বাহিৰে অন্যান্য দিনত আৰক্ষী অধীক্ষকসকলৰ অধীনস্থ এলেকাসমূহত নিয়োজিত আৰক্ষীৰ লোকসকলৰ প্ৰতি সপ্তাহত এটা ছুটীৰ দিন বাধ্যতামূলক কৰা হ'ব(Week off for Assam police personals) । অৱশ্যে এই নিয়ম থানা আৰু আৰক্ষী চকীসমূহৰ ভাৰপ্ৰাপ্ত বিষয়াসকলকে ধৰি ‘চার্জ পোষ্ট’ত থকা আৰক্ষীৰ অন্যান্য লোকসকলৰ ক্ষেত্ৰত প্ৰযোজ্য নহ’ব ।
আনহাতে, অসম আৰক্ষীৰ মুখ্য কাৰ্যালয়কে ধৰি সকলো জিলা, বেটেলিয়ানৰ কাৰ্যালয় আৰু অসম আৰক্ষীৰ অধীনস্থ অন্যান্য সংস্থাসমূহে অহা দুমাহৰ ভিতৰত মীমাংসা নোহোৱাকৈ থকা কৰ্মচাৰীৰ পেঞ্চন সংক্ৰান্তীয় কাম-কাজসমূহ নিষ্পত্তি কৰাটো নিশ্চিত কৰিব লাগিব ।
লগতে, এতিয়াৰ পৰা কমেও এবছৰৰ আগৰ পৰাই অৱসৰ গ্ৰহণ কৰিবলগা বিষয়া-কৰ্মচাৰী তথা অন্যান্য আৰক্ষীৰ লোকসকলৰ পেঞ্চন সংক্ৰান্তীয় কাম-কাজসমূহ আৰম্ভ কৰিব লাগিব । জিলা বেটেলিয়ানসমূহৰ লগতে আৰক্ষীৰ অন্যান্য সংস্থাসমূহত সকলো মহিলা আৰক্ষীৰ বাবে পৃথক ‘শৌচালয়’ৰ ব্যৱস্থা কৰা হ’ব । সেইদৰে আৰক্ষীৰ লোকসকলে ৰাইজে স্পষ্টকৈ দেখাকৈ স্থানীয় ভাষাত অথবা দ্বি-ভাষিক ‘নাম ফলক’ লগাব লাগিব ।
বৈঠকত আৰক্ষী সঞ্চালক প্ৰধান জি পি সিঙে কয় যে, আৰক্ষীৰ লোকসকলে ৰাইজক সঠিক আৰু নম্ৰ ব্যৱহাৰৰ লগতে পদবী নিৰ্বিশেষে সহকর্মীসকলকো উপযুক্ত সন্মান প্ৰদর্শন আৰু মৰ্যাদা প্ৰদান কৰাটো নিশ্চিত কৰিব লাগিব । আৰক্ষীৰ লোকসকলক তেওঁলোকৰ স্বাস্থ্যৰ যতন ল’বলৈও পৰামৰ্শ দি আৰক্ষী সঞ্চালক প্ৰধানগৰাকীয়ে পদবী নিৰ্বিশেষে সৰ্বোচ্চস্তৰত পেছাগত আৰু ব্যক্তিগত অনুশাসন মানি চলিবলৈ তেওঁলোকৰ প্ৰতি আহ্বান জনায় ।
লগতে পঢ়ক: top leader of ulfa independence Sangram Asom: আলফা স্বাধীনৰ শীৰ্ষ নেতা সংগ্ৰাম অসমৰ আত্মসমৰ্পণ
