গুৱাহাটী, 1 মে : লক্ ডাউনৰ মাজতে শুকুৰবাৰে পুৱা 8 বজাত শেষ নিশ্বাস ত্যাগ কৰে বিশিষ্ট বাঁওপন্থী লেখক-বুদ্ধিজীৱী তথা চি পি আই (এম) দলৰ প্ৰবীণ সদস্য অনিল ৰায়চৌধুৰীয়ে ৷ 94 বছৰ বয়সত গুৱাহাটীস্থিত চানমাৰিৰ নিজা বাসভৱনত মৃত্যু হয় বুদ্ধিজীৱীগৰাকীৰ ।
যুক্তিবাদী আৰু বিজ্ঞানমনস্ক অনিল ৰায়চৌধুৰীয়ে মৰণোত্তৰ নেত্রদান আৰু দেহদানৰ ইচ্ছা পত্ৰত স্বাক্ষৰ কৰি থৈছিল । কিন্তু কৰ'ণা ভাইৰাছৰ সংক্ৰমণ ৰোধৰ পৰিপ্ৰেক্ষিতত নেত্ৰদান সম্ভৱ নোহোৱাৰ উপক্ৰম ঘটিছে । মৰণোত্তৰ দেহদানৰ ইচ্ছা পূৰণৰ চেষ্টা চলোৱা হৈছে যদিও এতিয়াও সকলো কথা নিশ্চিত হোৱা নাই বুলি জানিবলৈ দিছে পৰিয়ালৰ সদস্যই।
উল্লেখ্য যে, ১৯৬৭ ৰ পৰা নীলাচল, মণিদীপ, অসমীয়া, আৱাহন আদিত সামাজিক বিষয় সমূহৰ ওপৰত লিখামেলা আৰম্ভ কৰিছিল প্ৰথিতযশা সমাজবিজ্ঞানী অনিল ৰায় চৌধুৰী । লগতে ট্ৰেড ইউনিয়ন আন্দোলনত জড়িত হৈ বহুবাৰ কাৰাবাসও খাটিছিল তেওঁ।
