গুৱাহাটী,15 অক্টোবৰ: দেওবাৰৰ পৰা ভক্তৰ বাবে খুলি দিয়া হৈছে শক্তিপীঠ কামাখ্যা ধামৰ দুৱাৰ । মন্দিৰ চৌহদৰ প্ৰৱেশদ্বাৰ খুলিলেও ভক্তই প্ৰৱেশ কৰিব নোৱাৰিব মূল মন্দিৰত । কেৱল চৌহদত পৰিক্ৰমা কৰিব পাৰিব সকলো ভক্তই । প্ৰশাসনে জাৰি কৰা নিৰ্দেশনা অনুসৰি মন্দিৰ পৰিচালনা সমিতিয়ে এই বিশেষ পদক্ষেপ গ্ৰহণ কৰিছে ।
নাৰ্ছাৰীত দৰ্শনাৰ্থীৰ বাবে স্বাস্থ্য পৰীক্ষা শিবিৰ স্থাপন কৰা হৈছে,য’ত প্ৰতিগৰাকী দৰ্শনাৰ্থীকে ক’ভিড পৰীক্ষা কৰোৱা হয় । কেৱল ক’ভিড নিগেটিভ লোককহে প্ৰৱেশৰ অনুমতি প্ৰদান কৰা হৈছে ।
মন্দিৰৰ চৌহদ খোলাৰ পাচতে প্ৰতিদিনেই বিভিন্ন প্ৰান্তৰ পৰা দৰ্শনাৰ্থী অহা পৰিলক্ষিত হৈছে। সকলো ভক্তকে সামাজিক দূৰত্ব বজাই ৰাখি মন্দিৰ দৰ্শনৰ বাবে কঠোৰ নিৰ্দেশনা প্ৰদান কৰিছে পৰিচালনা সমিতিয়ে । উল্লেখ্য যে,দুৰ্গা পূজাৰ পাচতহে মন্দিৰ সম্পূৰ্ণৰূপে খোলা-নোখোলা সন্দৰ্ভত দেৱালয় কৰ্তৃপক্ষই সিদ্ধান্ত ল’ব বুলি জানিব পৰা গৈছে ৷
