গুৱাহাটী,2 জানুৱাৰীঃ শনিবাৰে গুৱাহাটী চিকিৎসা মহাবিদ্যালয়ত হাস্পতালত চিকিৎসক আৰু নাৰ্চৰ সকলক লৈ কৰ’ণাৰ প্ৰতিষেধক প্ৰদানৰ এক অনুশীলন সম্পন্ন কৰা হয় ৷ সাধাৰণ জনতাক এই প্ৰতিষেধক প্ৰদান কৰাৰ পূৰ্বে চিকিৎসালয় খনৰ চিকিৎসক কৰ্মচাৰী সকলে কৰিলে এই অনুশীলন ৷ কিয়নো প্ৰতিষেধক প্ৰদানৰ সময়চোৱাত যাতে কোনোধৰণৰ বিসংগতিয়ে দেখা নিদিয়ে তাৰ বাবেই প্ৰতিষেধক আহি পোৱাৰ পূৰ্বেই বিশেষজ্ঞৰ নিৰীক্ষণত চিকিৎসাকৰ্মী সকলক লৈ প্ৰতিষেধক প্ৰদানৰ বাবে কৰা হ’ল এই অনুশীলন ৷
উল্লেখযোগ্য যে, ভেকচিন প্ৰদান কৰোতে 10 আৰু 30 মিনিটকৈ নিৰীক্ষণত ৰাখিব লাগিব প্ৰতিগৰাকী লোকক ৷ সেয়েহে প্ৰতিষেধক প্ৰদানৰ সমগ্ৰ প্ৰক্ৰিয়াটোত হ’ব পৰা সম্ভাব্য বিসংগতি সমূহ দূৰ কৰিবলৈকে এইদৰে অনুশীলনৰ ব্যৱস্থা কৰা হৈছে বুলি মন্তব্য কৰিলে স্বাস্থ্য বিভাগৰ প্ৰধান সচিব সমীৰ সিনহাই ৷ একেদৰে মহামাৰী ক’ৰণাৰ ভেকচিন ৰাজ্যত কেনেধৰণে প্ৰদান কৰিব আৰু কোন সকল লোকক অগ্ৰাধিকাৰ দিয়া হ'ব তাক লৈও মন্তব্য কৰিলে জি এম চি এইচৰ অধীক্ষক অভিজিত শৰ্মাই ৷
লগতে পঢ়কঃ অসমৰ এটা চেনেলে কেতিয়াও কংগ্ৰেছৰ ভাল কথা নকয়: ৰিপুণ বৰা
