গুৱাহাটী, ৮ আগষ্ট : ৰাজ্যত বলিবলৈ আৰম্ভ কৰিছে উপ নিৰ্বাচন(by election)ৰ গৰম বতাহ । খালী হোৱা বিধানসভাৰ পাঁচখন আসনৰ নিৰ্বাচনৰ বাবে কঁকালত টঙালি বান্ধিছে ৰাইজৰ দল(Raijor Dal) আৰু কংগ্ৰেছে(Congress) । বিজেপিক পৰাস্ত কৰাৰ স্বাৰ্থত দুয়োটা ৰাজনৈতিক দলে মিত্ৰতা স্থাপনৰ দিশে আগবাঢ়িছে ।
ইতিমধ্যে, শুকুৰবাৰে ৰাইজৰ দলৰ এটা প্ৰতিনিধিৰ দলে প্ৰদেশ কংগ্ৰেছৰ সভাপতি ভূপেন বৰাক লগ ধৰি ইয়াৰ এক স্পষ্ট ইংগিত প্ৰদান কৰিছে । তাৰ মাজতে দেওবাৰে প্ৰদেশ কংগ্ৰেছৰ এটা প্ৰতিনিধি দলে ৰাইজৰ দলৰ কাৰ্যালয়ত উপস্থিত হৈ সাক্ষাৎ কৰে দলটোৰ সভাপতি বিধায়ক অখিল গগৈৰ লগতে আন বিষয়ববীয়াক । ইয়াৰ দ্বাৰা এইটো কথা স্পষ্ট হৈ পৰিছে যে দুয়োটা দলেই মিত্রতাৰ বাবে আগুৱাই গৈছে ।
অৱশ্যে, এই মিত্রতাৰ মাজত এ আই ইউ ডি এফ(AIUDF) দল বাধাৰ প্ৰাচীৰ হিচাপে দেখা দিছে । কাৰণ, ৰাইজৰ দলে এ আই ইউ ডি এফ দলক কোনো কাৰণতে গ্ৰহণ নকৰে । দেওবাৰে ৰাইজৰ দলৰ প্ৰথমখন কাৰ্যনিৰ্বাহক বৈঠক অনুষ্ঠিত হোৱাৰ পাছতে এখন সংবাদমেল সম্বোধন কৰি অখিল গগৈয়ে এইক্ষেত্রত দলৰ স্থিতি স্পষ্ট কৰি দিয়ে ।
অখিল গগৈয়ে কয় যে, উপ-নিৰ্বাচনত সকলো বিৰোধী শক্তি একত্ৰিত হোৱাটো ৰাইজৰ দলে বিচাৰে । কিন্তু, এ আই ইউ ডি এফ দল, বিৰোধী শক্তিৰ লগত থাকিব নোৱাৰিব ৷ ইফালে, কংগ্ৰেছ দলে বিধানসভা নিৰ্বাচনৰ পূৰ্বে গঠন কৰা মহাজোঁটবন্ধন(Mohajot) এতিয়াও অব্যাহত আছে । এনে এক প্ৰেক্ষাপটৰ মাজতো দুয়োপক্ষই আলোচনা অব্যাহত ৰাখিছে ।
দেওবাৰে, বিয়লি পাঁচ বজাত প্ৰদেশ কংগ্ৰেছৰ নতুন কাৰ্যকৰী সভাপতি ৰাণা গোস্বামী আৰু জাকিৰ হুছেইন শিকদাৰে ৰাইজৰ দলৰ কাৰ্যালয়ত উপস্থিত হৈ অখিল গগৈৰে এক আলোচনাত মিলিত হয় । বৰ্তমান সময়ত এই আলোচনাই বিশেষ তাৎপৰ্য বহন কৰিছে । উল্লেখ্য যে, বিধানসভা নিৰ্বাচনত এ আই ইউ ডি এফৰে মিত্রতা কৰি কংগ্ৰেছ লাভৱান নহ'ল ।
বৰং বিশেষ লোকচানৰ সন্মুখীন হ'ল কংগ্ৰেছ দল । এনে পৰিপ্ৰেক্ষিতত এইবাৰ উপ-নিৰ্বাচনত এ আই ইউ ডি এফ দলক বাদ দি ৰাইজৰ দলক চামিল কৰাৰ দিশে অগ্ৰসৰ হৈছে কংগ্ৰেছ । অৱশ্যে এই কথা এতিয়াও ৰাজহুৱা কৰা হোৱা নাই । কিন্তু দুয়োটা দলৰ বিশেষ তৎপৰতা আৰু যোগাযোগে মিত্রতাৰ দিশে অগ্ৰসৰ হোৱাৰ দিশটোকে সূচাইছে ।
লগতে পঢ়ক : BTR ত টেট উত্তীৰ্ণই শীঘ্ৰে নিযুক্তি লাভ কৰিব : প্ৰমোদ বড়ো
