গুৱাহাটী, ৫ নৱেম্বৰ: শুকুৰবাৰে কামাখ্যা মন্দিৰ(Kamakhya Temple)ত আৱৰ্জনা নিষ্কাশনৰ এটা প্ৰকল্প মুকলি কৰা হয় । এক কোটি টকা ব্যয় সাপেক্ষে কামাখ্যা দেৱালয় পৰিচালনা কমিটীৰ কামাখ্যা মিছন আঁচনিৰ অধীনত নিৰ্মাণ কৰা আৱৰ্জনা নিষ্কাশন প্ৰকল্পটো আজি আনুষ্ঠানিকভাৱে উদ্বোধন কৰে মুখ্যমন্ত্রী ড৹ হিমন্ত বিশ্ব শৰ্মা(Himanta Biswa Sarma)ই ।
উল্লেখ্য যে, আজি কেদাৰনাথ ধামত প্ৰধানমন্ত্রী নৰেন্দ্ৰ মোডীয়ে আদিগুৰু শংকৰাচাৰ্যৰ ১২ ফুট উচ্চতাৰ মূৰ্তি উন্মোচন কৰাৰ লগত সংগতি ৰাখি ৰাজ্যিক বিজেপিৰ উদ্যোগত ৰাজ্যৰ পাঁচটাকৈ স্থানত আয়োজন কৰা হয় আধ্যাত্মিক অনুষ্ঠান । সেই উপলক্ষে কামাখ্যা দেৱালয়ত উপস্থিত হয় মুখ্যমন্ত্ৰী হিমন্ত বিশ্ব শৰ্মা । লগত উপস্থিত থাকে বিজেপিৰ ৰাজ্যিক সভাপতি ভৱেশ কলিতা, সাংসদ কুইন ওজা, বিধায়ক জয়ন্ত মল্ল বৰুৱা ।
মুখ্যমন্ত্রী হিমন্ত বিশ্ব শৰ্মাই মা কামাখ্যাৰ আশীষ লৈ মুকলি কৰে কামাখ্যা মিছন আঁচনিৰ অধীনত নিৰ্মিত আৱৰ্জনা নিষ্কাশন প্ৰকল্পটো । এই প্ৰকল্পটোৰ যোগেদি পেলনীয়া সামগ্ৰী নিষ্কাশন কৰি প্ৰস্তুত কৰা হ'ব প্ৰয়োজনীয় সামগ্ৰী । ভাষণ প্ৰসংগত মুখ্যমন্ত্রী হিমন্ত বিশ্ব শৰ্মাই কয় "কামাখ্যা দেৱালয়ে এক কোটি টকাৰ নিজৰ পুঁজিৰে স্বচ্ছতাৰ ক্ষেত্ৰত গুৰুত্ব প্ৰদান কৰি আৰ্ৱজনা নিষ্কাশন প্ৰকল্প স্থাপন কৰিছে । কামাখ্যা মন্দিৰৰ উন্নয়নৰ বাবে সদায় আমি কাম কৰি আছো । অহা দুই-তিনি মাহৰ ভিতৰত কামাখ্যাৰ নৱ নিৰ্মিত বিকল্প পথ শুভ উদ্বোধন কৰা হ'ব" ।
বিকলাংগ লোকসকলে এস্কেলেটৰৰ জৰিয়তে আহিব পৰাকৈ নতুনকৈ চিন্তা কৰা হৈছে বুলি মুখ্যমন্ত্রীগৰাকীয়ে জানিবলৈ দিয়ে । কামাখ্যাবাসীৰ দীৰ্ঘদিনীয়া পানীৰ সমস্যা দূৰ কৰা কথাও মুখ্যমন্ত্ৰীয়ে উল্লেখ কৰে ।
লগতে পঢ়ক : ঈশান উদয় ছাত্ৰ বৃত্তি কেলেংকাৰী : বঙাইগাঁৱত কলেজৰ অধ্যক্ষৰ বিৰুদ্ধে এজাহাৰ
