গুৱাহাটী, ৪ ফেব্ৰুৱাৰী: দেশৰ বিভিন্ন ধৰ্মীয় স্থানত বিভিন্ন পদ্ধতিৰে শিশুৰ অধিকাৰ খৰ্ব হৈ থকা ঘটনা ৰোধ কৰিবলৈ কঠোৰ স্থিতি গ্ৰহণ কৰিছে ৰাষ্ট্ৰীয় শিশু অধিকাৰ আৰু সুৰক্ষা আয়োগে । এই ক্ষেত্ৰত সাৰি যোৱা নাই অসমৰ কামাখ্যা দেৱালয়ো । কিছুদিন পূৰ্বে কামাখ্যা দেৱালয়ৰ চৌহদত এচাম কন্যা শিশুৱে কুমাৰী পূজাৰ নামত ভিক্ষা সংগ্ৰহ কৰি থকাৰ অভিযোগ লাভ কৰিছিল ৰাজ্যিক শিশু অধিকাৰ আৰু সুৰক্ষা আয়োগে ।
পৰৱৰ্তী পৰ্যায়ত আয়োগে নিজাকৈ অনুসন্ধান কৰিও এই অভিযোগৰ সত্যতা ধৰা পেলায় । বিষয়টো ৰাজ্যিক আয়োগে ৰাষ্ট্ৰীয় শিশু অধিকাৰ আৰু সুৰক্ষা আয়োগক জনোৱাৰ পিছত ৰাষ্ট্ৰীয় আয়োগেও নিজাকৈ পদক্ষেপ গ্ৰহণ কৰে । উল্লেখ্য যে, দেশৰ মুঠ ৫০টা এনে ধৰ্মীয় স্থান আয়োগে চিনাক্ত কৰিছে, য'ত শিশুৰ অধিকাৰ খৰ্ব কৰি অহা হৈছে ।
ইপিনে, ৰাষ্ট্ৰীয় শিশু অধিকাৰ আৰু সুৰক্ষা আয়োগে এখন ভাৰ্চুৱেল বৈঠক অনুষ্ঠিত কৰি কেতবোৰ ব্যৱস্থা গ্ৰহণৰ বাবে পৰামৰ্শ আগবঢ়াইছে । সেই অনুসৰি, কামাখ্যা আৰক্ষী চকীৰ অধীনত এজন শিশু উন্নয়ন আৰক্ষী বিষয়া নিযুক্তি দিয়াৰ ক্ষেত্ৰত গুৰুত্ব আৰোপ কৰিছে ৰাষ্ট্ৰীয় শিশু অধিকাৰ আৰু সুৰক্ষা আয়োগে ।
