গুৱাহাটী, 24 জুন : গুৱাহাটীৰ অভিজাত ব্যৱসায়িক প্ৰতিষ্ঠান শ্ব’হাম শ্বপি (Sohum Shoppe)ৰ স্বত্বাধিকাৰী সন্দীপ জালানৰ সন্ধান পোৱা গৈছে উত্তৰ প্ৰদেশৰ বাৰাণসীত । সন্দীপ জালানে বাৰাণসীৰ এটা মন্দিৰত আশ্ৰয় লৈ থকাৰ তথ্য পোৱা গৈছে । সন্দীপ জালানৰ সন্দৰ্ভত অসম আৰক্ষীয়ে উত্তৰ প্ৰদেশৰ আৰক্ষীৰ সৈতে যোগাযোগ কৰিছে ।
জানিব পৰা মতে, অতি শীঘ্ৰে তেওঁক অসমলৈ লৈ অনা হ'ব । অৱশ্যে তেওঁ কিয় আত্মগোপন কৰি আছিল সেই সন্দৰ্ভত এতিয়ালৈকে সবিশেষ জানিব পৰা নাই । সমগ্ৰ ঘটনাটো এতিয়াও ৰহস্যৰ আৱৰ্তত আছে ।
উল্লেখ্য যে, মঙলবাৰে সন্ধিয়া ভাগৰ পৰাই সন্ধানহীন (missing) হৈ আছিল গুৱাহাটীৰ অভিজাত ব্যৱসায়িক প্ৰতিষ্ঠান শ্ব'হাম শ্বপিৰ (Sohum Shoppe) স্বত্বাধিকাৰী সন্দীপ জালান ৷
মঙলবাৰে সন্ধিয়া প্ৰায় 7 বজাৰ পৰাই নিখোজ হৈ আছিল শ্ব'হাম শ্বপিৰ স্বত্বাধিকাৰী সন্দীপ জালান । মঙলবাৰে সন্ধিয়া খোজকাঢ়িবৰ বাবে ওলাই গৈছিল সন্দীপ জালান আৰু তেতিয়াৰে পৰাই তেওঁৰ কোনো সন্ধান লাভ কৰা নাছিল ব্যৱসায়ীগৰাকীৰ । চাইকেল চলাই এখন হোটেললৈ অহা সন্দীপ জালানে হোটেলৰ পৰা ওলাই পুনৰ শ্ব'হাম শ্বপিলৈ গৈছিল বুলি জানিব পৰা গৈছে । তাৰ পৰা এটা বেগত কাপোৰ ভৰাই তেওঁ ওলাই আহিছিল ।
আনহাতে, ম'বাইল ট্ৰেক (mobile track) অনুসৰি ছয়গাঁৱত পোৱা গৈছিল তেওঁৰ শেহতীয়া অৱস্থিতি । কিন্তু তেতিয়াও তেওঁৰ সন্দৰ্ভত পৰিয়ালৰ লোকে বিশেষ কোনো তথ্য প্ৰকাশ কৰা নাই । মঙলবাৰৰ পৰা ব্যৱসায়ীজনৰ সন্ধানত অসম আৰক্ষীয়ে (Assam Police) অভিযান অব্যাহত ৰাখিছিল । সান্ধ্য আইনৰ মাজতে গুৱাহাটীৰ মাজমজিয়াৰ পৰা এগৰাকী ব্যৱসায়ী নিৰুদ্দেশ হোৱাত চাঞ্চল্যৰ সৃষ্টি হৈছে ।
