অভিলেখ হাৰত গ্ৰন্থ বিক্ৰী উত্তৰ পূৱ গ্ৰন্থ মেলাত

প্ৰথম দিনটোৰ পৰাই এইবাৰৰ গ্ৰন্থমেলাত ব্যাপক হাৰত বিক্ৰী হৈছে গ্ৰন্থ ৷ অষ্টম দিনটোলৈকে ১ কোটিতকৈ অধিক টকাৰ গ্ৰন্থ বিক্ৰী হৈছে বুলি জানিবলৈ দিয়ে উদ্যোক্তাই ৷

গুৱাহাটী, 8 নৱেম্বৰঃ অষ্টমদিনাও গ্ৰন্থৰ সুৱাসত আমোল মোলাইছে চানমাৰীৰ অসম আভিযান্ত্ৰিক প্ৰতিষ্ঠানৰ খেলপথাৰ ৷ বিয়লিৰ ভাগত নিজৰ পছন্দৰ কিতাপ বিচাৰি বিপণীয়ে বিপণীয়ে ভিৰ কৰিছে গ্ৰন্থপ্ৰেমীয়ে ৷ এইবাৰৰ গ্ৰন্থমেলাত যুৱ প্ৰজন্মৰ অংশগ্ৰহণো প্ৰসংশনীয় ৷ আনহাতে প্ৰথম দিনটোৰ পৰাই এইবাৰৰ গ্ৰন্থমেলাত ব্যাপক হাৰত বিক্ৰী হৈছে গ্ৰন্থ ৷

সমান্তৰালকৈ গ্ৰন্থমেলাস্থলীত অনুষ্ঠিত হোৱা অনুষ্ঠানেও লাভ কৰিছে ব্যাপক সমাদৰ ৷ গ্ৰন্থবিক্ৰী পূৰ্বতকৈ এইবাৰ বহু পৰিমানে ভাল বুলি মন্তব্য কৰে উদ্যোক্তাসকলে ৷ অষ্টম দিনটোলৈকে ১ কোটিতকৈ অধিক টকাৰ গ্ৰন্থ বিক্ৰী হৈছে বুলি জানিবলৈ দিয়ে উদ্যোক্তাই ৷ সৰ্বাধিক হাৰত বিক্ৰী হোৱা গ্ৰন্থৰ ভিতৰত আছে অসমীয়া ভাষা সাহিত্যৰ গ্ৰন্থৰ লগতে হিমন্ত বিশ্ব শৰ্মাৰ 'ভিন্ন সময় অভিন্ন মত' গ্ৰন্থখনো ৷ অনাগত দিনকেইটাত বিক্ৰী আৰু ভাল হ'ব বুলি মন্তব্য কৰে আয়োজকে ৷

ডিজিটেল মাধ্যমৰ বহুল প্ৰচাৰেও প্ৰভাৱ পেলাব পৰা নাই গ্ৰন্থৰ চাহিদাত ৷ তাকে পুনৰবাৰ প্ৰতিপন্ন কৰিলে উত্তৰ পূৱ গ্ৰন্থমেলাই ৷