গুৱাহাটী , ৩০ অক্টোবৰঃ কেলেণ্ডাৰ গাৰ্ল, চান্দনী বাৰ, ট্ৰেফিক চিগনেল, ফেছন, পেজ থ্ৰি, চট্টা.... । কিমান নাম লব ! আৰু বহু জনপ্ৰিয় ছবিৰ নিৰ্মাতা তেওঁ । তেওঁ হৈছে বলিউডৰ এজন অন্যতম ব্যস্ত, জনপ্ৰিয় আৰু সচাঁ অৰ্থত ম'ষ্ট ফেশ্ব'নেৱল পৰিচালক । নাম তেওঁৰ মধুৰ ভাণ্ডাৰকাৰ । বহুকেইখন ব্লক বাষ্টাৰ ছবিৰ পৰিচালক মধুৰ ভাণ্ডাৰকাৰ । বলিউডৰ এইগৰাকী বিখ্যাত চলচ্চিত্ৰ পৰিচালকক বুধবাৰে সন্ধিয়া দেখা পোৱা গ'ল ৰাজধানীৰ জনতা ভৱনত ।
আচলতে মধুৰ ভাণ্ডাৰকাৰ গুৱাহাটীলৈ আহিছে বৃহস্পতিবাৰৰ পৰা অনুষ্ঠিত হ'বলগীয়া তৃতীয় গুৱাহাটী আন্তৰ্জাতিক চলচ্চিত্ৰ মহোৎসৱত ভাগ ল'বলৈ । তাৰেই অংশস্বৰূপে মুখ্যমন্ত্ৰী সৰ্বানন্দ সোণোৱালক সৌজন্যমূলক সাক্ষাৎ কৰিবলৈ বুধবাৰে সন্ধিয়া উপস্থিত হয় জনতা ভৱনত । দুয়োৰে সাক্ষাৎকালত বলিউডৰ পৰিচালক গৰাকীক তেওঁৰ এখন ছবিৰ দৃশ্যগ্ৰহণ অসমতো কৰিবলৈ অনুৰোধ জনায় মুখ্যমন্ত্ৰীয়ে । অসমীয়া ছবিয়ে দাক্ষিণাত্য বা বাংলা ছবিৰ সৈতে নিশ্চয় ফেৰ মাৰিব পৰা হৈ উঠিব বুলি মধুৰ ভাণ্ডাৰকাৰে আশা প্ৰকাশ কৰে ।
লগতে পঢ়কঃ মৰিগাঁৱত বোৱঁতী কলঙত মাছমৰীয়াৰ অবৈধ ভেটা
