গুৱাহাটী, ২৩ ফেব্ৰুৱাৰী : আগন্তুক লোকসভা নিৰ্বাচনৰ বাবে ইতিমধ্যেই তৎপৰ হৈ পৰিছে শাসকীয় দল বিজেপি (BJP preparation to general election 2024) । '১২ প্লাছ'ৰ লক্ষ্য লৈ বিজেপিয়ে আৰম্ভ কৰিছে ৰণকৌশল (Assam BJP blueprint for lok sabha election 2024) । কংগ্ৰেছৰ দখলত থকা লোকসভাৰ তিনিটা সমষ্টি যিকোনো প্ৰকাৰে বিজেপিয়ে এইবাৰ দখলৰ লক্ষ্য গ্ৰহণ কৰিছে । ইফালে দলটোৰ বহু ন-পুৰণি নেতাই প্রার্থিত্বৰ বাবে আগতীয়াকৈ প্ৰভাৱ বিস্তাৰত নামি পৰিছে । কংগ্ৰেছৰ দখলত থকা বৰপেটা, কলিয়াবৰ আৰু নগাঁও এইবাৰ বিজেপিয়ে দখলৰ পথ প্ৰশস্ত কৰিবলৈ মাৰ্চত এই তিনিওটা সমষ্টিত উপস্থিত হ’ব দলটোৰ ৰাষ্ট্ৰীয় সভাপতি জে পি নাড্ডা (JP Nadda to visit Assam) ।
মাৰ্চত ৰাষ্ট্ৰীয় সভাপতিগৰাকী এই সমষ্টি তিনিটাত উপস্থিত হ’ব বুলি আগতীয়া সূচী প্ৰস্তুত কৰাত আগন্তুক নিৰ্বাচনত এই সমষ্টিকেইটাত বিজেপিয়ে প্রার্থী থিয় কৰোৱাটো নিশ্চিত । উল্লেখ্য যে, কংগ্ৰেছৰ দখলত থকা এই সমষ্টি তিনিটাৰ বৰপেটা আৰু কলিয়াবৰ বিগত নিৰ্বাচনত বিজেপিয়ে অগপক এৰি দিছিল (AGP BJP lok sabha election alliance) । কেৱল নগাঁৱতহে বিজেপিয়ে প্রার্থিত্ব দিছিল । পূৰ্বৰ কেইবাটাও নিৰ্বাচনৰ জৰিয়তে নগাঁও নিজৰ দখলত ৰাখিবলৈ সক্ষম হোৱা বিজেপিয়ে ২০১৯ চনৰ নিৰ্বাচনত সমষ্টিটো হেৰুৱাবলগা হৈছিল (BJP strategy for Nagaon lok sabha constituency) ।
কংগ্ৰেছৰ প্ৰদ্যুৎ বৰদলৈৰ হাতত পৰাজিত হৈছিল বিজেপিৰ ৰূপক শৰ্মা । ইফালে কলিয়াবৰত অগপৰ প্ৰাৰ্থী মণিমাধৱ মহন্ত কংগ্ৰেছৰ গৌৰৱ গগৈৰ হাতত আৰু বৰপেটাত কংগ্ৰেছৰ আব্দুল খালেকৰ হাতত অগপৰ কুমাৰ দীপক দাস পৰাজিত হৈছিল (congress MP Gaurab Gogoi) । ২০১৯-ৰ নির্বাচনত বিজেপিয়ে অগপক কলিয়াবৰ, বৰপেটাৰ লগতে ধুবুৰী সমষ্টি এৰি দিছিল যদিও আঞ্চলিক দলটোৱে এটা সমষ্টিও দখল কৰিবলৈ সক্ষম নহ'ল । ইয়াৰ বিপৰীতে বিজেপিয়ে ৯টা সমষ্টি দখল কৰি অসমত লোকসভাৰ নিৰ্বাচনত ইতিহাস ৰচিছিল । বিগত নির্বাচনত অগপই এখনো আসন লাভ কৰিবলৈ সক্ষম নহ’ল । সেয়ে এইবাৰ বিজেপিয়ে কলিয়াবৰ আৰু বৰপেটা এৰি দিবলৈ বিচৰা নাই । হয়তো ধুবুৰী অগপৰ বাবে এৰি বৰপেটা আৰু কলিয়াবৰত নিজাববীয়া প্রার্থী আগবঢ়াব বিজেপিয়ে ।
এনে এখন ছবি আগতীয়াকৈ স্পষ্ট হোৱাত এতিয়া গেৰুৱা দলটোৰ বহু নেতাই সমষ্টি দুটাৰ প্রার্থিত্বৰ বাবে আগতীয়াকৈ প্ৰভাৱ বিস্তাৰত নামি পৰিছে । তাৰ মাজতেই আকৌ কংগ্ৰেছৰ দখলত থকা নগাঁৱৰ বাবেও প্রার্থিত্ব প্ৰত্যাশীৰ তালিকা দীঘলীয়া হৈ গৈ আছে । নগাঁৱৰ বাবে দলৰ ৰাজ্যিক সাধাৰণ সম্পাদক দীপ্লু ৰঞ্জন শৰ্মা আৰু প্ৰাক্তন সাংসদ ৰাজেন গোঁহাইৰ পুত্ৰই জোৰদাৰ প্ৰচেষ্টা অব্যাহত ৰাখিছে । সেইদৰে কলিয়াবৰৰ বাবেও মৃণাল শইকীয়াৰ লগতে আন কেইবাজনৰো নাম চৰ্চাত আছে । বৰপেটাৰ বাবে হেতা-ওপৰা লগাইছে কেইবাজনো নেতাই । কিন্তু গেৰুৱা দলটোৱে আগতীয়াকৈ প্রার্থী বাছনিত গুৰুত্ব দিয়াৰ পৰিৱৰ্তে সমষ্টি দখলৰ অংকতহে ব্যস্ত হৈছে ।
বিশেষকৈ মাৰ্চত ৰাষ্ট্ৰীয় সভাপতি অসমলৈ আহিলে বৰপেটা, কলিয়াবৰ আৰু নগাঁৱত কেনেধৰণৰ কাৰ্যসূচী গ্ৰহণ কৰা হ’ব তাৰ পৰিকল্পনাত ব্যস্ত হৈছে ৰাজ্যিক বিজেপি । লোকসভা নির্বাচনক লৈ গেৰুৱা দলটোৰ এনে স্থিতিৰ বিপৰীতে মিত্ৰদল অগপই এতিয়ালৈকে কেইটা সমষ্টিত প্ৰতিদ্বন্দ্বিতা আগবঢ়াব সেই কথা স্পষ্ট কৰা নাই । মিত্রদল অগপই বিগ ব্ৰাদাৰ বিজেপিৰ পৰা কেৱল মাত্র এটা সমষ্টি লাভ কৰিব পাৰে । তাকো বৰ্তমান সময়ত নিশ্চিত নহয় ।
লগতে পঢ়ক :Pawan Khera arrested: কংগ্ৰেছ নেতা পৱন খেৰাক গ্ৰেপ্তাৰ অসম আৰক্ষীৰ
